Sajuta Pelaku UMKM Jabar Meunang Banpres Produktif

0

Bandung, bewarajabar.com — Kurang leuwih 1.028.000 pelaku UMKM (usaha mikro, kecil, & menengah) di Jawa Barat  narima Banpres (Bantuan Presiden) Produktif Usaha Mikro Rp 2,4 juta.

Kepala Dinas KUK (Koperasi & Usaha Kecil) Provinsi Jabar Kusmana Hartadji nembrakkeun, eta angka terus nambahan, ku kituna bakal terus divalidasi data pelaku UMKM. “Surat Keputusan penerima bantuan kalima jeung kagenep tacan turun. Lina ti kitu, masih keneh ngomean data nu can lengkep, aya keneh nu alamatna kosong jeung sajabana,” pokna.

Kusmana ngalaporkeun, pihakna jeung dinas nu mayungan UMKM di kabupaten/kota geus ngususlkeun kurang leuwih 1.538.344 pelaku UMKM pikeun meunang bantuan. Salian ti Dinas KUK Jabar, usulan dilaksanakeun perbankan, PNM (Permodalan Nasional Madani), jeung koperasi.

Nurutkeun Kusmana, salian ti ngadorong pelaku UMKM pikeun nyerep bantuan tunai ti pamarentah pusat, pihakna ngilu marengan pelaku UMKM sangkan bisa ngaakses perbankan. “Aya program UMKM Juara. Boga by name by address kurang leuwih 3.000 UMKM pikeun diprospek ku sababaraha kantor cabang bank bjb,” pokna.

Disagedengeun kitu, Pemprov Jabar dina ieu hal Dinas KUK Jabar meuli 10 juta masker produk UMKM. Tujuanna sangkan pelaku UMKM produksi deui sanggeus dihantam krisis akibat COVID-19. Meuli masker UMKM dibagi dua tahap. Tahap kahiji masker nu dibeuli lobana 2 juta masker ti 200 UMKM. Tahap kadua, Pemda Provinsi Jabar mesen 8 juta masker ti 400 UMKM.

“Pelatihan terus dilaksanakeun ka UMKM. Kumaha carana maranehna ngajual produkna sacara online. Ningkatkeun kapasitas SDM pelaku UMKM terus dilaksanakeun sangkan aktivitas UMKM teu pareum salila pandemi,” tandes Kusmana. (Dan)

LEAVE A REPLY

Please enter your comment!
Please enter your name here