12 Desember Hari Pencak Silat Jabar Ridwan Kamil Jadi Pendekar Jawa Barat

0
Gubernur Jawa Barat Ridwan Kamil dibere gelar Pendekar Jawa Barat ku rengrengan IPSI Jabar, sarta ngadeklarasikeun tanggal 12 Desember jadi Hari Pencak Silat Jawa Barat.

Bandung, bewarajabar.com — Gubernur Jawa Barat Ridwan Kamil meunang gelar Pendekar Jawa Barat ti IPSI (Ikatan Pencak Silat Indonesia) Jabar di Gedung Sate, Saptu (12/12/2020).

Eta gelar dibikeun ka Ridwan Kamil nitenan jasa sarta kiprahna dina ngamajukeun Pencak Silat, kaasup tarekahna nepika Pencak Silat dijadikeun warisan dunia tak benda ku Unesco 12 Desember 2019.

“Eta hal geus jadi kawajibanna salaku pituin Jawa Barat sakaligus salaku pejabat publik,” ceuk Ridwan Kamil dina biantarana.

Sakumaha pada apal sawaktu ngajabat Walikota Bandung, Ridwan Kamil pidato dihareupeun PBB ngapresentasikeun Pencak Silat nu payus dijadikeun warisan dunia tak benda.

“Alhamdulillah ku rojongan masarakat Jawa Barat utamana para penggiat, eta cita-cita ngawujud, tanggal 12 Desember 2019 di Bogota Amerika Selatan, Unesco netepkeun Pencak Silat jadi warisan dunia tak benda, nu tangtuna kudu dimumule,” tandes Ridwan Kamil.

Ku kituna, Ridwan Kamil katut rengrengan IPSI Jabar ngadeklarasikeun tanggal 12 Desember, jadi Hari Pencak Silat Jawa Barat. Samalah eta pangeling ngeling bakal diusulkeun ka pamarentah pusat jadi Hari Pencak Silat Nasional malah nepika tingkat Dunia atawa internasional.

Tarekah saterusna, ceuk Ridwan Kamil, Pemprov Jabar geus ngaalokasikeun tanah legana kurang leuwih 5 nepika 8 hektar di Jatinangor Kabupaten Sumedang pikeun dijadikeun pusat budaya Jawa Barat. “Pikeun sakabeh budaya, kaasup Pencak Silat. Mun seuh hiji mangsa Unesco datang ka Jawa Barat, bisa dibuktikeun kadariaan dina ngamumulena,” pokna.

Ridwan Kamil nambahkeun, Pemorov Jabar geus ngarancang Pencak Silat jadi kurikulum nu diajarkeun di sakola-sakola. “Insya Allah bakal dimimitian di taun ajaran anyar nu bakal datang,” tandesna.

Tinggalkan Balasan