Kadisdik Jabar : “Kado Milangkala PGRI jeung HGN” Pemprov Jawa Barat Nyawalakeun Ngiridit Imah Murah Pikeun Guru

oleh
Gubernur Jabar Ridwan Kamil, dibarengan Kadisdik Jabar Dedi Supandi katut Ketua PGRI Jabar Dede Amar nyaksikeun nandatangan MoU program Bataru nu dilaksanakeun ku pengembang jeung Bank bjb, di Sakola Cakra Buana Kota Depok, sawatara waktu katukang.

Bandung,  –  Dina poenan HGN (Hari Guru Nasional), Pemprov (Pemerintah Daerah Provinsi) Jawa Barat nyawalakeun Program Kredit Rumah Tinggal Bersubsidi pikeun penyelenggara pendidikan nu dingaranan Bataru (Bakti Padamu Guru). Eta program lain ngan saukur pikeun level SMA wungkul, tapi oge pikeun PAUD-SD-SMP.

Bataru  lumaku pikeun guru, tenaga administrasi sakola, nepika penjaga sakola nu panghasilanna dihandap Rp 8 juta sarta tacan ngabogaan imah. Kuayana Bataru tenaga pendidikan bisa kabedag meuli imah nu hargana Rp 150 juta ku cara ngiridit tur nyicilan Rp 900 rebu per bulan. Anapon waragadna Pemprov Jabar gawe babarengan jeung bank bjb.

Nyawalakeun Bataru dilaksanakeun ku Gubernur Jabar Ridwan Kamil dina acara ngareuah reuah HGN tingkat Jawa Barat sarta milangkala ka 75 PGRI (Persatuan Guru Republik Indonesia) di Sakola Cakra Buana Kota Depok, Rebo (25/11/20) nu kaliwat. Nyawalakeun Bataru ditandaan ku nandatangan MoU (nota kesepahaman) antara Pengembang Indonesia jeung bank bjb ngeunaan Program Rumah Subsidi untuk Guru dan Tenaga Kependidikan.

Dina Bataru tahap kahiji total aya 10 rebu unit imah nu bakal dibangun taun ieu sumebar di di 17 kabupaten/kota. Diantarana, Kota Banjar, Kota Depok, Kabupaten Bogor, Kab. Bekasi, Kab. Sukabumi, Kab. Cianjur, Kab. Karawang, Kab. Bandung Barat, Kab. Purwakarta, Kab. Subang, Kab. Bandung, Kab. Garut, Kab. Indramayu, Kab. Ciamis, Kab. Kuningan, Kab. Cirebon, jeung Kabupaten Pangandaran.

Eta ngarupakeun tahap kahiji, mun seug geus rengse bakal dilajengkeun ka tahap saterusna. Gubernur Jabar nganggap eta hal hadiah pikeun para guru. “Muga muga hadiah ti Pemprov Jabar dina HGN jeung milangkala ka 75 PGRI, bisa ngabantu ngaronjatkeun karaharjaan Tenaga Pendidikan ku ngabogaan imah milik pribadi kalayan hargana kabedag,” ceuk Ridwan Kamil.

Nurutkeun Ridwan Kamil, para penyelanggara pendidikan bisa ngaakses ngiridit imah ka bank bjb cicilanna Rp 900.000 per bulan.  Syaratna, pendapatan tenaga kependidikan teu meunang leuwih ti Rp 8 juta per bulan turta tacan ngabogaan imah. “Ku kituna, Pemprov Jabar narekahan ngaronjatkeun karaharjaan ku henteu salawasna ningkatkeun pendapatan, tapi nurunkeun pengeluaran, nu biasana nyicilan pikeun ngontrak imah digeser kana imah milik pribadi ku program Bataru,” pokna.

Ridwan Kamil ngajentrekeun, bakal ngamaksimalkeun program Bataru dina taun nu bakal datang ku neangan titik lokasi nu anyar sarta sasaranna dilegaan. “Jumlah total guru di Jabar leuwih ti 200 rebuan. Ku kituna bakal neangan deui lokasi-lokasi nu digawe barengkeun jeung developer lokal sarta Bank bjb nu bakal masilitasan para guru atawa tenaga kependidikan,” tandesna.

Jeroning kitu, Kepala Dinas Pendidikan Provinsi Jabar Dedi Supandi ngebrehkeun, MoU Pemprov Jabar jeung Bank bjb pikeun program imah subsidi ngarupakeun hal nu ngagumbirakeun para guru katut tenaga kependidikan.

Bataru nyaeta program nu ngabantu tenaga pendidik pikeun boga imah nu statusna hak milik. Salila ieu para guru katut tenaga pendidik sejenna hese boga imah pribadi ngan saukur bisa pindah ti imah kontrakan ka kontrakan sejenna. Eta kondisi matak prihatin nginget jasa guru nu teu kaitung ka dunia pendidikan nasional.

Dedi mastikeun, total Bataru aa 20 rebu unit dina tahap kahiji taun ieu targetna 10 rebu unit sumebar di 17 kabupaten/kota diharepkeun geus aya ijinna, sanggeus MoU bisa diteruskeun ku neundeun batu cikal disaksikeun Kementerian Perumahan Rakyat, gancangna Desember 2020 katompernakeun geus akad kredit.