REKOMENDASI
Jakarta, bewarajabar.com — Direktur Uji Kompetensi Wartawan (UKW) PWI Pusat, Rajab Ritonga ngebrehkeun, yen PWI Pusat teu kungsi ngayakeun UKW di Jakarta dina 19-20 Oktober 2018. Kulantaran kitu teu kungsi ngajukeun rekomendasi diterbitkeunana Serfitikat Kompetensi Wartawan ka Dewan Pers tina hasil kagiatan UKW eta.
Kasauran Direktur UKW ditepikeun, lantaran sumebarna Sertifikat Kompetensi UKW PWI nu saolah-olah diterbitkeun ku lembaga uji PWI Pusat dina tanggal 19 November 2019, diteken ku Ketua Umum PWI Pusat, Atal S. Depari jeung Ketua Dewan Pers, Yosep Adi Prasetyo.
“Eta sertifikat teh geus bisa dipastikeun palsu, jeung taya daptarna di Dewan Pers. Mangga pariksa di web Dewan Pers” ceuk Rajab Ritonga. Tanggal diterbitkeunana eta sertifikat oge kawilang aheng, sataun leuwih ti saprak diayakeunana UKW.
Ceuk Rajab, sababaraha kaahengan liana katangen dina eta sertifikat, matak gampang pisan pihakna nyindekkeun palsuna eta sertifikat teh. “Ketua Dewan Pers, ti 21 Mei 2019 geus dijabat ku Pa Muhamad Nuh, lain Pa Adi Prasetyo deui,” ceuk Rajab.
Lian ti eta, inyana ngembohan, logo PWI dina eta sertifikat oge palsu. “Teu sarua jeung PWI nu saenyana,” ceuk Rajab bari nembrakeun yen pagawean samodel malsukeun ngarupakeun tindak pidana.
Dina eta kasempetan Rajab oge ngebrehkeun, Lembaga UKW PWI Pusat teu kungsi ngayakeun UKW sacara virtual, lantaran materi uji UKW can bisa sagemblengna diujikeun sacara online. Pasualan eta ditepikeun kulantaran ayana informasi di hiji wewengkon nu ngayakeun lumangsungna UKW online. ( Ajay )
