Bandung, bewarajabar.com – Nitenan kasuksesan kinerja PWI (Persatuan Wartawan Indonesia) Kota Bandung, ngajadikeun rengrengan saprofesi di sababaraha wewengkon hayang guguru ngagali leuwih wedel informasi.
Sangeus sawatara waktu nu kaliwat, PWI Makassar, kiwari PWI Aceh Jaya Nanggroe Aceh Darussalam ngadongdon PWI Kota Bandung.
REKOMENDASI
“Ngadenge turta maca disaniskara media, PWI Kota Bandung hasil ngawangun sinergitas ku sababaraha stekholder, kaasup jeung Pemkot Bandung. Ku kituna,
ti Aceh ngadongdon ka Bandung hayang diajar leuwih wedel,” ceuk Hendra, wawakil PWI Aceh Jaya sawaktu silaturahmi jeung PWI Kota Bandung, di Sekretariat Jalan Ahmad Yani 262 kawasan Sidoliq Stadion Persib Bandung Kemis (26/9) nu kaliwat.
Nurutkeun wartawan Rakyat Aceh Jawa Pos Group ieu, pihakna ngarasa perlu ngalaksanakeun studi banding. Salian ti promosi wisatana cukup hade, pemberitaan sabudeureun pangwangunan nu dilaksanakeun PWI Kota Bandung kalintang hadena.
“Beda jeung di Aceh, aya keneh pejabat nu alergi ka media, padahal mun seug lain media nu ngabewarakeun, kumaha masarakat apal program program pamarentah daerah,” ceuk Hendra.
Jeroning kitu, Ketua PWI Kota Bandung Hardiyansyah SH ngebrehkeun, Bandung dipiwanoh salah sahiji kota tujuan wisata. “Pemda Aceh Jaya oge kudu komit, promosina kudu dikuatkeun deui, lantaran geus jadi tugas Pemda pikeun promosi, salah sahijina ngaliwatan PWI, ku pemberitaan, atawa gawe babarengan,” pokna.
PWI Kota Bandung, ceuk Hardiyansyah, geus ngajalin gawe babarengan jeung sababaraha SKPD, diantarana Dispora Kota Bandung. “Aya sababaraha kagiatan nu geus jalan, saperti sawatara waktu katukang mere pelatihan jurnalistik pikeun para nonoman Kota Bandung. Lian ti kitu, gawe babarengan jeung Pemkota Bandung geus heubeul. Tangtuna eta hal bisa disawalakeun ku PWI Aceh Jaya,” tandesna.
Sarengsena silaturahmi, PWI Aceh Jaya mere oleh oleh Kopi Robusta nu dilola ku PWI Aceh Jaya. Sedengkeun PWI Kota Bandung nyerenkeun tilam katineung mangrupa miniatur angklung has Sunda. ( )
