REKOMENDASI
Bandung, bewarajabar. com – Walikota Bandung, Oded M. Danial meredih Satpol PP (Satuan Polisi Pamong Praja) Kota Bandung terus ngaronjatkeun kinerjana. Sabab, Satpol PP Kota Bandung kudu jadi garda panghareupna dina nanjeurkeun Perda (Peraturan Daerah) Kota Bandung.
“Satpol PP kudu nembongkeun kinerja panghadena, sarta mertahankeun integritas dina proses ngawangun Kota Bandung babarengan,” tandes Oded dina acara “Pembekalan Rohani” di lingkungan Satpol PP Kota Bandung di Gedong Prof Dr. Satrio Sesko AD, Jalan Gatot Subtoto, Kota Bandung, Senen (17/6/2019).
Sok sanajan boga peran jadi penegak Perda, ceuk Oded, Satpol PP kudu tetep someah ka ka masarakat. “Jadi dina disiplin katakwaan, mun seug ngalaksanakeun tugas tong nepika kasar ka masarakat,” pokna.
Nurutkeun Oded, pembekalan rohani sakaligus halalbihalal eta bisa jadi momentum pikeun ngaronjatkeun katakwaan anggota Satpol PP Kota Bandung. “Disiplin tur prinsip katakwaan cirina aya titu, nyaeta henteu ngambek, silih hampura, turta salawasna ngabina silaturahim antar umat manusa. Tilu hal eta kudu diamalkeun dina proses ngawangun Kota Bandung,” tandesna.
Jeroning kitu, Plt Kepala Satpol PP Kota Bandung, Tantan Surya Santana ngaapresiasi piwuruk tur bingbingan Walikota Bandung ka Satpol PP Kota Bandung salila ieu. “Diluuhanna ieu acara ku Pa Wali ngarupakeun bukti kanyaah anjeunna ka Satpol PP,” pokna.
Tantan ngajen silaturahmi jadi konci ngarengsekeun pasualan antar manusa dina proses kahirupan. “Mugia ku silaturahmi, urang sararea bisa babarengan ngawangun Kota Bandung,” tandesna sabari nambahkeunn yen dina eta kagiatan dieusi ku mere santunan ka 20 anak yatim. ( Dadan )
