Bandung, bewarajabar.com — DPRD Provinsi Jawa Barat ngingetkeun sakumna pihak nu aya patula patalina jeung pelaksanaan Pilkada Serentak 2020 pikeun tetep waspada turta ngalaksanakeun protokol kasehatan dina nyegah ayana klaster anyar Covid-19.
Samemehna, KPU RI ngameunangkeun ayana konser musik dina kampanye calon kepala daerah di Pilkada Serentak 2020 disajeroning pandemi Covid-19. Ku kituna, Anggota Komisi I DPRD Jabar, Ahab Sihabudin nembrakkeun, pihakna teu mikahayang Pilkada Serentak jadi klaster anyar Covid-19.
[irp]
Dumasar eta hal, Ahab nembrakkeun DPRD Jabar bakal ngayakeun audiensi ka KPU RI kalayan tujuan sangkan protokol kasehatan sacara ketat bisa dilarapkeun salila lumangsungna pesta demokrasi. “Bakal ngadongdon ka KPU Pusat muga muga bisa dirobah tong jadi klaster anyar covid-19 di Pilkada ieu,” pokna, di Gedong DPRD Jabar, Jalan Diponegoro Bandung, Juma’ah (18/9/2020).
Ahab ngajentrekeun, kiwari DPRD Jabar keur fokus kana pelaksanaan Pilkada di sajeroning pandemi Covid-19. KU kituna, salawasna ngingetkeun ka penyelenggara Pemilu sangkan ngalarapkeun protokol kasehatan.
Nurutkeun Ahab, Komisi I DPRD Jabar sawatara waktu katukang, ngadongdon ka KPU Kabupaten Bandung pikeun nganyahokeun kumaha tahapan-tahapan Pilkada jeung agendana. “Nyatana masih aya rapat terbuka, sanajan diwatesan, tapi di lapangan, saha nu mampuh pikeun ngawatesanna,” tandesna.
