Bandung bewarajabar.com – SMSI Jawa Barat babarengan jeung PWI Kota Bandung ngabagikeun ratusan paket sembako jeung masker ka masarakat kurang mampuh di sawatara jalan di kota bandung, Salasa (21/4/2020). Sasaranana nyaeta tukang jajaluk (baramaen), tukang mulung, tukang ngamen, barudak jalanan jeung supir angkot jeung ojek online.
Ketua Serikat Media Siber Indonesia (SMSI) Jawa Barat, Hardiyansyah ngebrehkeun, yen sembako dan masker nu dibagikeun teh ngahaja dibagikeun ka masarakat leutik nu keuna ku pangaruh pandemi Covid-19.
REKOMENDASI
“ Sakumaha nu kanyahoan ku urang sarerea, kulantaran ayana pandemi covid-19, loba pisan warga nu kaleungitan pakadabab. Komo, Rebo (22/4/2020), isuk rek dilumakukeun Pembatasan Sosial Berskala Besar (PSBB) di Bandung Raya, tangtuna bakal leuwih ngaheureutkeun lengkah maranehna, ku kituna bakal mangaruhan pisan kana panghasilan sapopoe. Ieu bantuan teh ngan sakadar pikeun ngurangan bangbaluh maranehna,” pokna.
Lalaki nu dipiwanoh Andhy teh ngembohan, mangratus-ratus sembako jeung masker kanyaah ti SMSI Jawa barat jeung PWI Kota Bandung pikeun masarakat.
“ ku dibagikeunana paket sembako ngarupakeun wujud kanyaah SMSI Jawa Barat jeung PWI Kota Bandung, pikeun masarakat nu keuna ku pangaruh pandemik covid-19, “ ceuk Andhy.
Inyana oge ngajelaskeun, SMSI jabar jeung PWI Kota Bandung nurunkeun opat tim, pikeun ngadisitribusikeun sembako jeung masker.
Wewengkon jalan nu jadi target sasaran nyaeta, sabudeureun rute Jalan Kembang Sepatu, Jln. Malabar, kawasan Taman Wartawan, Jln. Talaga Bodas, Jln. Lodaya jeung kawasan Buahbatu. Lian ti eta Zona Barat sabudeureun Jln. Asia Afrika, Jln. Lengkong Besar, Jln. Pungkur, Kawasan Tegalega, Jln. Astanaanyar, Jln. Terusan Pasir Koja, kawasan Festival Citylink, Jln. Laswi nepi ka Jln. Kliningan.
Tuluy Jalan Kemuning, Jln. Anggrek, Jln. Patrakomala, Jln. Tongkeng, Jln. Aceh, Jln. Lombok, Jln. Citarum, Jln. Sentot Alibasa, Jln. Diponegoro, Jln. Ariajipang, kawasan Dago, Jln. Dipatiukur, Jln. Dayangsumbi, sabudeureun Babakan Siliwangi tug ka Jln. Cihampelas.
Tug nepu ka sabudeureun Jalan Lengkong Kecil, Lengkong Besar, Jln. Ciateul, kawasan Tegalega, Jln. Moch Toha, Kawasan Lingkar Selatan, Turangga, Jln. Gatot Subroto, Kawasan Lingkar Selatan nepika Jln. Aceh.
“Urang sarerea miharep, ieu bantuan teh bisa ngabantu bantu ngaringankeun beban maranehna,” ceuk Andhy.
Inyana oge sakaligus neredih ka sakumna masarakat Jawa Barat jeung kota Bandung, pikeun babarengan taat kana aturan salila lumakuna PSBB. “Hayu urang dukung upaya pamarentah pikeun megatkeun mata rantai penyebaran covid-19, kucara tetep cicing di imah, remen ngumbah leungeun, ngajaga jarak, jeung make masker atawa APD mun kapaksa kaluar imah,” ajak Andhy.
Lian ti eta, pihakna oge mepelingan ka masarakat sangkan tumut kana aturan pamarentah jeung penerapan social distancing oge physical distancing, ku cara tetep ngajaga jarak jeung salawasna make masker mun kapaksa kudu kaluar imah.
“ Pijkeun megatkeun mata rantai penyebaran covid-19, sim kuring ngelingan ka sakumna masarakat pikeun tumut kana PSBB, ngarah pandemik corona gancang rengse,” pokna.(rls)
