Pangandaran, bewarajabar.com – Koperasi Pena Karya Sejahtera disahkeun Persatuan Wartawan Indonesia (PWI) Pokja Kota Bandung dina rapat anggota nu lumangsung di Pangandaran Salasa (24/9-2019) nu kaliwat.
Dibentukna Koperasi PWI Kota Bandung lumangsung kalayan demokratis tur harmonis diiluan 42 peserta. Pemilihan pangurus koperasi diiluan tilu kandidat, nyaeta Rusyandi, Maman Suherman, jeung Asep Yulianto. Pemilihan dilaksanakeun ku voting nu dipingpin langsung Ketua PWI Kota Bandung H. Hardyansyah, SH dibarengan Wakil Ketua Asep Budiyanto katut Zaenal Ikhsan.
Hasil voting netepkeun Maman Suherman jadi ketua kalayan meunang 16 sora gejlog sasora ti Rusyandi nu ngan meunang 15 sora. Ketua Koperasi pinilih Maman Suherman dibere hak preogratif pikeun ngabentuk kapengurusan u ngawengku sekretaris jeung bendahara dina waktu saminggu pikeun periode 2019-2021.
Hasil kasapukan rapat dina musyawarah nangtukeun iuran pokok gedena Rp. 250 rebu sarta iuran wajib Rp. 50 rebu, kalayan bentuk koperasi nyaeta Koperasi Serba Usaha (KSU).
Sarengsena kapetona Maman mingpin koperasi, Ketua PWI Kota Bandung Hardyansyah ngarasa reueus turta ngaapresiasi lancarna musyarawah ngabentuk Koperasi Pena Karya Sejahtera. Ku kituna, bakal mere dana hibah Rp. 10 juta pikeun lengkah awal jalanna organisasi koperasi. “Koperasi nu geus dibentuk kudu mangpaat pikeun karaharjaan anggota PWI Kota Bandung,” tandesna.
Dina eta kasempetan, Maman Suherman sanggeus kapilih jadi Ketua Koperasi Pena Karya Sejahtera nembrakkeun, sabenarna PWI Kota Bandung kurang leuwih lima welas taun katukang geus kungsi boga koperasi. Ngan, dina lajuning lakuna eta koperasi henteu jalan sakumaha tujuan diadegkeunna koperasi.
“Ku kituna, sanggeus Pangurus PWI Kota Bandung koordinasi jeung Dinas Koperasi & Usaha Kecil Kota Bandung, kapangurusan PWI Kota Bandung bisa disatujuan ku sakumna anggota antukna ngabentuk deui koperasi,” tandes Maman.
Suksesna kabentuk kapangurusan Koperasi PWI Kota Bandung teu leupas tina rojongan BJB, BJB Syariah, PT. Pos Indonesia sarta Humas Pemkot Bandung. ( Ade )
