Bandung, bewarajabar.com — Walikota Bandung, Oded M. Danial ngistrenan 9 Pejabat Tinggi Pratama jeung Jabatan Administator di lingkungan Pemkot (Pemerintah Kota) Bandung, sawatara waktu katukang.
Para pejabat nu diistrenan nyaeta, Asep Gufron jadi Asisten Pemerintahan & Kesra di Sekretariat Daerah, Bambang Sukardi jadi Kepala Badan Kesatuan Bangsa & Politik, Medi Mahendra jadi Kepala Bagian Kesejahteraan Rakyat & Kemasyarakatan, Budhi Rukmana jadi Kepala Bagian Perekonomian.
Hendrawan jadi Kepala Bagian Pemerintahan, Slamet Agus Priono jadi Sekretaris Satuan Polisi Pamong Praja, Solihin jadi Inspektur Pembantu Wilayah I di Inspektorat, Pagat Risjanuar Passa jadi Inspektur Pembantu Wilayah IV di Inspektorat, sarta Jaenudin jadi Camat Gedebage.
Ngistrenan dilaksanakeun di Plaza Balai Kota Bandung kalayan ngalarapkeun protokol kasehatan nyaeta ngajaga jarak turta make masker. Acara diluuhan Wakil Walikota Bandung, Yana Mulyana katut Sekda (Sekretaris Daerah) Kota Bandung, Ema Sumarna sarta sajumlah pejabat publik Pemkot Bandung.
Oded nandeskeun, para pejabat ngabogaan tugas utama ngalayanan masarakat. Ku kituna, para pejabat kudu kreatif tut inovatif pikeun mere pelayanan nu hade ka masarakat. Lian ti kitu, pejabat kudu aktif, gawe rancage sarta nyontoan ka para pagawena.
“Para pejabat tong pasif. Tong loba cicing atawa ngadeluk di kantor, sok komo ngan saukur bisa marentah anak buah. Tapi kudu tampil panghareupna gawe rancage jadi conto pikeun bawahanna,” tandesna.
Nurutkeun Oded, para pejabat tangtuna kudu wani nyanghareupan resiko, saluyu jeung aturan. Pejabat kudu proaktif dina ngungkulan pasualan turta turun ka lapangan sangkan paham kalayan tembres. Pejabat kudu ngamangpaatkeun sumber daya nu aya pikeun ngarengsekeun pagaweana.
“Pejabat kudu berfikir cerdas tur sistematis ngungkulan pasualan nu disanghareupan sakaligus ngaantisipasi kamungkinan pasualan nu anyar. Gunakeun sumber daya nu aya di unit kerja sewang sewangan,” ceuk Oded.
