Bandung, bewarajabar.com – Enggoning ngaronjatkeun ajen atawa kualitas ngalarapkeun manajemen kinerja nu sajalan tur konsisten jeung dilarapkeunna reformasi birokrasi sarta kahontalna hasil program kerja jeung pelayanan publik nu leuwih hade tur mibanda kualitas, Kemenag (Kementerian Agama) Kantor Kota Bandung ngayakeun kagiatan nyusun SAKIP LAKIP (Sistem Akuntabilitas Kinerja Instansi Pemerintahan-Laporan Akuntabilitas Kinerja Instansi Pemerintah).
Kagiatan lumangsung di Hotel Lingga Jalan Soekarno Hatta, sawatara waktu katukang. Turta diluuhan ku 11 urang peserta salaku tim penyusun SAKIP LAKIP. Acara dibuka sacara langsung ku Kepala Kementerian Agama Kantor Kota Bandung, H. Yusuf, dibarengan Kepala Subag TU, H. Mimin Sutisna.
Yusuf dina biantarana ngajentrekeun yen kagiatan nyusunan SAKIP LAKIP kalintang penting dilaksanakeun nginget LAKIP dina sistem akuntabilitas kinerja instansi pamarentah ngarupakeun gambaran tinulis ngeunaan kaberhasilan sarta kagagalan program pelayanan publik sakaligus peranna jadi alat kendali sarta penilai kualitas kinerja. “Pentingna ngaronjatkeun kinerja pagawe tangtuna kudu dibarengan ku katepatan sarta kaakuratan dina nempatkeun para pagawe saluyu jeung kaparigelan turta kaahlian jeung kompetensina,” pokna.
Nurutkeun Yusuf, ku laksanana ngaronjatkeun kinerja pagawe tangtuna nyusun SAKIP LAKIP kudu dituturkeun ku pelaksanaan analisis jabatan pikeun mere informasi nu aya gunana turta nangtukeun syarat-syarat tenaga kerja sacara kualitatif.
Analisis jabatan, ceuk Yusuf, nembongkeun jenis-jenis jabatan sarta karyawan-karyawan nu diperlukeun pikeun ngarengsekeun tugas-tugas di instansi jeung organisasi. “Ku kituna kalintang tepatna din eta kagiatan salian ti ngabahas turta nitenan SAKIP LAKIP diteruskeun ku agenda ngabahas analisis jabatan,” pokna.
Jeroning kitu, Kepala Subag TU, H. Mimin Sutisna, dina laporanna nandeskeun, kagiatan nyusunan SAKIP LAKIP eta dilaksanakeun ngarupakeun amanat instansi, tangtuna Kemenag Kota Bandung kudu ngalaksanakeun eta kagiatan sarta jadi dasar dina pelaksanaan program kagiatan kahareupna.
Mimin nandeskeun, nyusun SAKIP LAKIP eta dina raraga persiapan dina ngalaksanakeun audit kinerja sarta audit tugas jeung fungsi ti satiap ASN nu aya di lingkungan Kementerian Agama Kantor Kota Bandung.
Mimin meredih ka tim 11 pikeun daria dina ngalaksanakeun tugasna sarta ngahasilkeun hasil SAKIP LAKIP nu hade tur nembongkeun visi tur misi Kementerian Agama Kantor Kota Bandung tina satiap rumusanna hususna dina nyieun Renstra (rencana strategis) pikeun taun 2019-2024 kahareup. ( adar )
