Bandung, bewarajabar.com — Dina raraga nyanghareupan rencana dilumakukeunna Permen (Peraturan Menteri Kelautan & Perikanan) ngeunaan UPI (Usaha Pembudidayaan Ikan) ka stakeholders nu aya patula patalina, KKP (Kementerian Kelautan & Perikanan) ngayakeun konsultasi publik di Bandung, Salasa (21/5/2019).
Acara diluuhan Dinas Kabupaten/Kota sa-Jawa Barat, instansi sejen nu aya patula patalina, para pembudidaya lauk, sarta perwakilan pihak pausahaan swasta boh dina bidang binih, ngagedekeun, pakaan atawa parab jeung ubar lauk.
Dina eta kasempetan, Direktur Jenderal Perikanan Budidaya, Slamet Soebjakto ngebrehkeun, konsultasi publik tumali dilumakukeunna aturan ngarupakeun proses nu mutlak kudu dilaksanankeun, sakumaha amanat dina Permen KP 25 taun 2012, dirobah ku Permen KP No 49 taun 2017.
Nurutkeun Slamet, efektifitas tina regulasi atawa aturan ditangtukeun ku peran partisipasi publik, kaasup aspirasina, lantaran publik salaku objek langsung kana aturan nu bakal lumaku. “Konsultasi publik eta tujuanna pikeun nyerep usulan tina rencana dilumakukeunna Permen KP. Eta penting sangkan publik faham tur katarimana kajamin,” pokna.
Anapon Rancangan Permen KP ngeunaan usaha pembudidayaan eta ngarupakeuen pembaharuan tina Permen KP samemehna. Poin pentingna nyaeta implementasi sistem perijinan usaha makae Online Single Submission (OSS).
Slamet ngajentrekeun, sistem OSS ngarupakeun bagian tina upaya reformasi birokrasi nyaeta kumaha ngaronjatkeun pelayanan perizinan nu terintegrasi, efisien tur akuntable. Disebutkanna, aya 6 prinsip dasar ngalarapkeun OSS nyaeta gampangna akses, terstandarisasi, terintegrasi, pengawasan ku profesi bersertifikat, kapercayaan ka pelaku usaha pikeun nyumponan standar sarta kacumponanna aspek kasalametan, kasehatan, sarta kaamanan jeung lingkungan.
“Tujuan utama sistem OSS nyaeta mere pelayanan publik sacara prima. Salah sahijina nu pada ngaarangluh taya lian perijinan nu hese tur lila. Pangaruhna kurang optimalna investasi. Ku ayana OSS tangtuna ngagampangkeun investasi kaasup kana subsektor perikanan budidaya,” tandes Slamet. (Adar)
