Bandung, bewarajabar.com – PWI (Persatuan Wartawan Indonesia) Kota Bandung ngeusi Ramadhan ku ngabagikeun takjil haratis kanu ngalaliwat disabudeureun Sekretariat PWI Kota Bandung di Stadion Sidolig Jalan Ahmad Yani No 262 Bandung, Juma’ah (10/5/2019).
Ngabagikeun takjil haratis dilaksanakeun PWI Kota Bandung ngarupakeun bentuk kanyaah tur ngajenan ka kaum muslim nu keur ngalaksanakeun ibadah puasa turta keur aya di panyabaan atawa diperjalanan.
Ampir sakabeh anggota PWI babarengan turun ka jalan pikeun ngabagikeun ratusan kolek jeung kadaharan sejenna di tilu tempat, diantarana di hareupeun Sidolig, peuntaseun jalan dihareupeun Kantor Disdik Kota Bandung sarta di perempatan Jalan Ahmad Yani-Laswi.
Salian ti nu ngagunakeun jalan boh nu laleumpang kitu deui nu marake kendaraan sarta aparat kepolisian nu ngatur arus lalu lintas sarua kabagean berkah Ramadhan nu dilaksanakeun ku PWI Kota Bandung di eta lokasi.
Ketua PWI Kota Bandung, Hardiyansyah, SH nu dipiwanoh Andhy disajeroning
ngabagikeun takjil di lokasi ngajentrekeun, eta kagiatan rencanana bakal dilaksanakeun ku PWI Kota Bandung unggal poe Jumaah salila Ramadhan, ngabagikeun takjil haratis nu tempat jeung lokasina beda beda.
“Kalayan asamana PWI Kota Bandung, ngarasa reueus bisa mere turta ngabagikeun kadaharan pikeun buka puasa ka masarakat. Sok sanajan ala kadarna diharepkeun bisa mangpaat pikeun nu narimana,” tandes Andhy.
Di lokasi ngabagikeun takjil, salah saurang tukang dagang narah disebutkeun ngarana, nandeskeun yen ngarasa bungah kuayana kagiatan berkah Ramadhan ku ngabagikeun takjil haratis nu dilaksanakeun ku PWI Kota Bandung. “Alhamdulillah hatur nuhun ntos kabagean takjil haratis. Mun seug bisa mah dironjatkeun deui sangkan kabehanna kabagean, lantaran aya keneh masarakat nu ngabutuhkeun can kabagean,” pokna.
Anggota Polantas nu harita keur sibuk ngalaksanakeun tugasna ngaapresiasi kalayan positif, ngahaturkeun nuhun ka PWI Pokja Kota Bandung nu geus ngabagikeun takjil haratis kalayan tartib. ( adar )
