Bandung, bewarajabar.com — Walikota Bandung, Oded M. Danial nyerenkeun pangajen ka 29 anggota Tim Prabu Polrestabes Bandung.
Eta pangajen ngarupkeun bentuk apresiasi kana dedikasi tur kinerja tim Prabu ngajaga kondisi Kota Bandung tetep aman tur tumaninah.
Oded dibarengan Kapolrestabes Bandung, Kombes Ulung Sampurna nyerenkeun kadeudeuh Rp 1 juta ka 29 anggota Tim Prabu, sarengsena mimpin apel di Mapolrestabes Bandung, Jalan Merdeka, sawatara waktu katukang.
“Alhamdulilah Pemkot bisa mere pangajen ka Tim Prabu. Maranehna luar biasa tugas di lapangan, maranehna tim buser (buru sergap) nu ngabantu Kota Bandung tetep kondusif,” tandes Oded.
Oded ngajentrekeun, ti saprak ngadeg Tim Prabu digawe kalayan hade. Najan aya pandemi Covid-19, Tim Prabu tetep ngalakasanakeun tugasna miara kaamanan tur katartiban Kota Bandung.
Oded miharep eta pangajen jadi motivasi sangkan sakumna anggota Tim Prabu leuwih giat dina ngalaksanakeun tugas ngajaga Kota Bandung.
“Kota Bandung kondusif ku ketakna polisi. Kepolisian geus ngabantu ngajadikeun Kota Bandung aman tur tumaninah,” pokna.
