Soreang, bewarajabar.com — Opat Fraksi partai politik nolak hasil rapat pembahasan badan anggaran (Banggar) patali jeung pembahasan Kebijakan Umum Perubahan Anggaran & Prioritas Plafon Anggaran Sementara (KUPA PPAS) Tahun Anggaran 2020. Ku ayana eta hal ngabalukarkeun Penandatanganan Nota Kesepakatan KUPA PPAS Taun Anggaran 2020 nu diajengkeun ku Tim Anggaran Pamarentah Daerah (TAPBD) Kabupaten Bandung di DPRD Kabupaten Bandung teu bisa dilaksanakeun.
Opat fraksi nu nolak eta teh nyeta PKB, Nasdem, Demokrat jeung PKS. Sedengkeun dua fraksi sejenna nyaeta PDI P jeung PAN abstain (teu mere sora/rojongan). Fraksi nu nyatujuan nyaeta ngan saukur partai Golkar jeung partai Gerindra.
Ketua Fraksi Nasdem DPRD Kabupaten Bandung, Toni Permana netelakeun yen ditolakna hasil rapat paripurna Penandatangan Nota Kesepakatan KUPA PPAS tahun anggaran 2020 teh lantaran opat fraksi partai politik eta meredih sangkan pingpinan DPRD Kabupaten Bandung ngabahas deui KUPA PPAS eta.
[irp]
“Intina, pihakna meredih sangkan pingpinan dewan bisa ngalakukeun deui pembahasan ulang atawa sahenteuna ngayakeun pembahasan nu leuwih jero deui,” pokna.
Nurutkeun Toni, pingpinan dewan katangen maksakeun teuing pikeun neruskeun tahapan pembahasan nepi ka proses paripurna. Samemehna, kaopat fraksi nyoba ngirim surat ka pingpinan DPRD Kabupaten Bandung sangkan pembahasan KUPA PPAS parobahan eta teh diundur pikeun sajeroning waktu. Tapi pingpinan DPRD Kabupaten Bandung tetep keukeuh ngalaksanakeun rapat pembahasan eta.
“Alesanana mah yen rapat pembahasan KUPA PPAS teh geus rengse dibahas, sarta dianggapna surat ti pihakna teh cenah geus telat. Sedengkeun jadwal rapat badan anggaran geus disaluyuan dua poe (Kemis jeung Juma’ah, tanggal 3 jeung 4 September 2020). Sabab dina waktu eta teh keur disibukeun ku jadwalna pendaftaran di KPU,” pokna.
Tapi, masih ceuk Toni, dina waktu hasil pembahasan KUPA PPAS badan anggaran eta dibawa ka badan musyawarah (Bamus). Kagiatan pembahasan KUPA PPAS malah dianggap geus rengse. Sarta proses eta teh dianggapna geus nyumponan.
“Kanyataanna dina rapat bamus kaungkab sagemblengna. Ku kituna nu opat fraksi eta teh nolak hasil pembahasan badan anggaran lantaran kaungkab dina rapat Bamus aya sababaraha masalah pembahasan KUPA PPAS parobahan nu can tuntas dibahas sagemblengna. Ku kituna, pihakna menta diulang atawa diteruskeun pembahasanna lantaran aya sababaraha hal nu kudu diperjelas deui,” pokna.
[irp]
Salah sahiji nu jadi masalah kaopat fraksi eta teh nyaeta aya dina panyadiaan dana hibah jeung bansos. Masalahna, ayana pos anggaran panyadiaan dana hibah jeung bansos eta teh teu dilengkepan ku data calon penerima jeung calon lokasi (CPCL) sarta teu dilengkepan ku peraturan bupati.
“Teu ka data saha nu bakal narimana atawa sabaraha nu bakal dianggarkeun pikeun masing-masing pihak. Tah ieu nu jadi masalahna. Komo deui di taun politik saperti kiwari, pihakna hayang mastikeun yen proses pembahasan anggaran parobahan ieu teh taya patalina jeung politisasi anggaran nu antukna teu mihak kana kapentingan masarakat,” pokna deui.
Najan teu dirinci sacara gamblang, sababaraha nominal anggaranana dipikahariwang (dicurigai) ku opat fraksi eta, tapi toni nyebutkeun yen anggaran eta teh loba disimpen di sajumlah SKPD.
“Jumlahna kawilang gede. Matakna engke bakal di kritisi deui. Bakal ditanyakeun ka SKPD. Naha nepika nyimpen anggaran nu sakitu gedena. Keur naon? Ku kituna butuh kajelasan. Kaopat fraksi ieu hariwang aya politisasi APBD di taun politik ieu. Lantaran anggaran ieu sakuduna dipake pikeun kapentingan masarakat, lain keur kapentingan pilkada,” ceuk Toni.
[irp]
Komo deui saupamana nilik kana Surat Keputusan Bersama (SKB) dua menteri, Keputusan Menteri Keuangan jeung Mendagri No. 177/KMK.07/2020 ngeunaan percepatan penyelesaian APBD 2020 dina raraga ngungkulan Covid-19 sarta pengamanan daya beuli masarakat jeung perekonomian nasional. Salah sahijina nyebutkeun yen patali anggaran hibah jeung bansos, sakuduna di refocusing sacara total pikeun kapentingan ngungkulan panedemi covid-19.
“Hibah jeung Bansos nyatana teu direfocus-keun sacara total. Aya oge organisasi nu teu meunang narima hibah rutin dina tiap taun anggaran sacara rutin. Ku kituna pihakna hayang mastikeun wungkul yen eta hal teh ulah nepika kajadian,” pokna.
Ku kituna, Toni netelakeun yen kaopat fraksi nu nolak hasil pembahasan KUPA PPAS tinggal nunggu sikap ti pingpinan DPRD Kabupaten Bandung. Naha rek dibahas ulang, atawa rek diteruskeun pembahasanna atawa malah rek dieureunkeun pembahasanna tur balik deui ka APBD murni 2020. Pihakna oge siap ngondang TAPD pikeun meredih sangkan pembahasan KUPA PPAS dibahas deui. Lantaran sacara prinsip can meunang penjelasan nu gamblang ngeunaan KUPA PPAS nu geus disodorkeun,” pokna teh. **
