Soreang, bewarajabar.com — Dadang Supriatna siap ngaleupas korsi DPRD di DPRD Provinsi Jawa Barat pikeun nyalonkeun diri jadi Bupati Bandung di Pilkada Kabupaten Bandung 2020.
Pikeun maju di Pilkada 2020, Dadang dibarengan ku Sahrul Gunawan nu jadi wakilna. Eta pasangan dirojong ku PKB, Nasdem, Demokrat, jeung PKS.
Dina waktuna jadi caleg engke, Dadang maju ti Partai Golkar, tapi kiwari dirina kaluar ti Golkar kalayan gabung jeung PKB. Dadang nyebutkeun, PKB bangkit pikeun parobahan di Kabupaten Bandung.
[irp]
“PKB geus ngayakeun sababaraha inovasi nu kawilang hade dina ngagerakkeun para kaderna di pilkada 2020,” ceuk Dadang, di Al-Jawami, Kec. Cileunyi, Kab. Bandung. Dadang ngajentrekeun maksud tina bangkit ieu teh, nyaeta ngajak masarakat pikeun nguniang hudang tina kasusah, hususna dina sektor ekonomi di widang UKM,” pokna.
“Saupama masarakat Kabupaten Bandung geus bangkit, edukatif, dinamis jeung agamis antukna masarakat Kabupaten Bandung bakal raharja,” tandesna.
Saupama Dadang maju jadi bupati di pilkada 2020, inyana jangji bakal merjuangkeun anggaran kurang leuwih Rp. 100 miliar/taun pikeun insentif para guru ngaji atawa para ustadz sareng ustazah.
“Kuayana anggaran Rp. 100 miliar, diharepkeun tiap ustadz jeung ustazah nu jumlahna ngahontal kurang leuwih 18-20 rebu urang, muga-muga bisa meunang bantuan insentif Rp. 500.00/bulanna,” ceuk Dadang.
Nurutkeun Dadang, samemehna para guru ngaji ngan saukur meunang Rp. 50.000/bulan. “Tangtu eta insentif teh kawilang kurang manusiawi,” ceuk Dadang.
[irp]
Lian ti eta, Dadang oge bakal mere perhatian husus ka masarakat desa, utamana ka para Ketua RT jeung RW sangkan meunang duit insentif jeung pelayanan BPJS.
Dadang jangji, bakal ngupyakeun anggaran Rp. 100 juta/RW nu digunakeun keur ekonomi kerakyatan nu gedena kurang leuwih Rp. 60 juta sarta keur infrastruktur Rp. 40 juta. “Eta moal ngaganggu anggaran Bumdes,” pokna.
Pamungkas, Dadang miharep eta hal teh bisa nyiptakeun lowongan gawe di desa sarta masarakat bisa kahindar tina masalah bank emok. Sedengkeun patali jeung kasehatan, Dadang rarancangna rek ngawangun rumah sakit di 4 titik.
