Bandung, bewarajabar.com – Fraksi Golkar Amanah DPRD Jawa Barat mikahayang panghasilan guru di daerah pasisian ngaronjat. Maranehna kudu diperhatikeun kalayan daria batan guru di daerah nu geus maju.
Kitu ditembrakkeun, Ketua Fraksi Golkar Amanah DPRD Jabar, Yod Mintaraga sarengsena Rapat Paripurna tumali jeung Pandangan Umum Fraksi-Fraksi kana Raperda Perubahan APBD Jabar Taun Anggaran (TA) 2019.
“Engkena bakal diukur saluyu jeung kamampuhan keuangan daerah. Mampuna sakitu nya sakitu. Tapi narekahan pikeun ngomean kamampuhan panghasilan guru di daerah pasisian jadi perhatian Partai Golkar,” ceuk Yod di gedong DPRD Jabar Jalan Diponegoro, Bandung, Senen (26/8).
Sanajan kitu, ceuk Yod, eta hal karek sawates pandangan ti Fraksi Golkar Amanah. Pihakna bakal nungguan jawaban nu bakal ditepikeun Gubernur Jabar, Ridwan Kamil dina Rapat Paripurna nu agendana Jawaban Gubernur kana Pemandangan Umum Fraksi-Fraksi kana Raperda Perubahan APBD Provinsi Jabar TA 2019.
“Nu jadi pertanyaan naha guru di daerah pasisian geus diperhatikeun. Mun seug tacan diperhatikeun, tangtuna bakal dijawab turta dijentrekeun ku Gubernur kalayan wincikan anggaranna,” tandes Yod.
Sanggeus kitu, ceuk Yod, fraksi-fraksi di DPRD Jabar bakal ngungkabkeun sikepna dina pendapat ahir. Kiwari karek sawates pendalaman tumali APBD Perubahan. “Can jadi kaputusan ahir. Masih nungguan jawaban ti eksekutif,” pokna. (amat )
