Bandung, bewarajabar.com – Ketua DPRD Provinsi Jawa Barat Ineu Purwadewi Sundari tinekanan ngahontal gelar doktor dina Bidang Studi Ilmu Pemerintahan, Fakultas Ilmu Sosial & Ilmu Politik, Universitas Padjadjaran sarengsena Sidang Promosi Doktor, kalayan hasil predikat cumlaude di Kampus Universitas Padjadjaran, Jalan Dipatiukur Kota Bandung, sawatara waktu katukang.
“Alhamdulillah disertasi kuring nu judulna ‘Partisipasi Dalam Perumusan Kebijakan Publik‘ bisa nganteurkeun kuring ngahontal gelar doktor ti Unpad,” tandes Ineu Purwadewi Sundari, di Bandung, Senen (27/05/2019).
Ineu Purwadewi Sundari nu dipiwanoh Teh Ineu dina sidang promosi doktor eta diluuhan ku pimpinan katut anggota DPRD Provinsi Jawa Barat, tokoh masarakat sarta akademisi. Teh Ineu bisa mertahankeun disertasina ku ngajawab sakabeh pertanyaan ti tim promotor katut profesor sejenna.
Teh Ineu ngahaturkeun nuhun ka tim promotor, para profesor katut guru besar, sarta Rektor Unpad nu geus ngabingbingna dina ngarengsekeun studi doktor eta. Dirina ngahontal gelar doktor lain samata mata pikeun ngahontal nilai akademis, tapi kageuing pikeun ngarojong partisipasi sakumna elemen masarakat dina medalkeun kebijakan publik nu mihak ka masarakat.
Nurutkeun Teh Ineu, konteks panalungtikanna eta sumberna tina peran DPRD dina ngarumuskeun saniskara kebijakan nu sumberna tina aspirasi nu mekar di masarakat. Ngan dina pelaksanaanna ngamunculkeun saniskara harepan jeung nu ngarangluh nu diungkabkeun ku masarakat ka DPRD ngajadikeun peran aspirasi ieu jadi penting dina bagian cara ngarumuskeun kebijakan pikeun pamarentah daerah. “Tingaal kumaha DPRD ngalola aspirasi nu diungkabkeun eta jadi berkualitas salaku wujud partisipasi masarakat dina ngarumuskeun kebijakan publik,” tandesna.
Eta hasil panalungtikan ngabuktikeun yen aspirasi masarakat ngarupakeun bentuk pertisipasi proses perumusan kebijakan publik di Jawa Barat geus ngabogaan posisi nu strategis turta kabuktian mampuh nangtukeun persepsi Anggota DPRD Jawa Barat hususna di Dapil Jabar IX. “Eta aspirasi kudu jadi prioritas, sangkan jadi muatan penting dina kebijakan publik nu dirumuskeun,” tandes Teh Ineu.
Eta hal, ceuk Teh Ineu, dikuatkeun ku fakta di lapangan nu nembongkeun lobana produk kebijakan nu direalisasikeun dina program tur kagiatan pangwangunan nu geus ditarima tur dirasakeun mangfaatna ku masarakat. “Najan kitu realisasi masarakat dina wujud partisapsi tacan sagemblengna bisa diwujudkeun, lantaran proses ngarumuskeun kebijakan kudu sapagodos jeung kawenangan penganggaran sarta political will Pamarentahan Daerah di Provinsi Jawa Barat,” pokna. (Amat Heryadin)
