Bandung, bewarajabar.com – Bulan Ramadhan geus asup poe ka duapuluh tilu, teu karasa sakeudeung deui nyanghareupan Lebaran atawa Hari Raya Idul Fitri. Samemeh asup waktu libur atawa cuti bersama, Kanwil Kementerian Agama Provinsi Jawa Barat gawe babarengan jeung Baznas Provinsi Jawa Barat ngayakeun kagiatan Sosial Keagamaan nyaeta Pembagian Paket Sembako kanu ngabutuhkeun, lumangsung di Aula Ussisa Al Maula Kanwil Kemenag Provinsi Jawa Barat, Salasa (28/5/2019).
Ngabagikeun sembako diluuhan Kabid Penais, Zakat & Wakaf, H. A. Patoni, Kabid PAIS, Dr. H. M. Athoillah, Ketua BAZNAS Prov. Jawa Barat, H. Arif Ramdani katut pejabat eselon IV di lingkungan Kanwil Kemenag Jabar.
Kepala Bidang Penaiszawa, H. Ahmad Patoni, salaku Ketua Panitia ngalaporkeun yen tujuan dilaksanakeunna eta kagiatan nyaeta pikeun ngaraketkeun tali silaturahmi turta Ukhuwah Islamiyah diantara pagawe di lingkungan Kanwil Kemenag Jabar sarta masarakat nu aya disabudeureun.
Teu poho H. Ahmad Patoni ngahaturkeun nuhun ka Baznas Provinsi Jawa Barat ku suksesna kagiatan Sosial Keagamaan eta. “Eta kagiatan lumangsung kualpukahna gawe babarengan UPZ Kanwil Kemenag Jabar jeung Baznas Provinsi Jawa Barat. Mugia eta gawe babarengan leuwih kajalin turta leuwih raket sarta meunang barokah ti Allah SWT,” pokna.
Dina eta kasempetan, Kepala Baznas Provinsi Jawa Barat, KH. Arif Ramdani ngarasa reueus tur ngajentrekeun yen kiwari Baznas Provinsi Jawa Barat geus nyalurkeun bantuan disababaraha titik. “Baznas terus narekahan masarakat pikeun nyalurkeun zakatna ka Baznas sangkan bisa nglola zakat nepika dirasakeun mangpaatna ku masarakat utamana kaum dhuafa jeung fakir miskin,” tandesna.
Nutup kagiatan seremonial eta, dibagikeun sacara simbolis ka opat mustahiq ku Kepala Bagian Tata Usaha, Kabid Penaiszawa, Kabid PAI, katut Ketua Baznas Jawa Barat. Ngabagikeun sembako eta dilaksanakeun salila dua poe nyaeta Salasa jeung Rebo tanggal 28 jeung 29 Mei 2019, di Aula Usisa Al Maula Kanwil Kemenag Jabar.
Disajeroning ngabagikeun paket sembako, Kasi Pemberdayaan Zakat, H. Asep Nanang Munandar, ngajentrekeun, kagiatan Sosial Keagamaan eta ngabagikeun paket sembako ka 186 masarakat nu aya disabudeureun Kantor Kanwil Kemenag Jabar, 324 mustahiq nu diusulkeun muzaki jeung honorer Kanwil Kemenag Provinsi Jawa Barat.
Asep Nanang nambahkeun, ampir sakumna pagawe di Kanwil Kemenag Jawa Barat geus mayar zakatna nu disalurkeun ka UPZ Kanwil Kemenag Jawa Barat. “Ngan sapuluh urang pagawe nu encan, tujuh diantarana nyaeta pagawe nu ayar pindah ka Kanwil Kemenag Jabar jeung nu tiluan deui tacan mayar zakat alatan aya alesan nu tangtu,” tandesna. (Adar)
