Bandung, bewarajabar.com – Walikota Bandung, Oded M. Danial nitipkeun pameredih husus ka para Calhaj (calon jemaah haji) ti Kota Bandung nu bakal miang ka Tanah Suci taun 1440 Hijriah ieu. Sacara husus Walikota Bandung nu dipiwanoh Mang Oded meredih sangkan para Calhaj ngadoakeun Kota Bandung.
“Mugia warga Kota Bandung dibere kasehatan, dikuatakeun iman tur katakwaanna. Sarta Kota Bandung jadi kota nu baldatun thayyibatun. Haji ngarupakeun ibadah nu kalintang istimewa. Para jamaah Kota Bandung aya di Makkah jeung Madinah loba tempat mustajab. Kuring meredih sakumna jamaah haji pikeun ngadoakeun Kota Bandung,” ceuk Oded di Masjid Pusdai, Jalan Diponegoro, Bandung, Senen (1/7/2019).
Dina eta kasempetan, Oded sacara resmi ngajurunglaku 2.605 Calhaj Kota Bandung nu kabagi dina 10 kloter. Ti jumlah sakitu geus kaasup para petugas pendamping ti Kemenag (Kementerian Agama) Kota Bandung. Jamaah haji ti Kota Bandung didominasi ku kaum hawa.
Oded meredih sangkan para Calhaj nyiapkeun dirina kalayan wedel. Salian ti fisik tur wawasan tata cara pelaksanaan ibadah haji. Nu penting nyaeta nyiapkeun bekel mental tur spiritual.
Oded ngajentrekeun, ibadah haji ngarupakeun ibadah nu istimewa, beda jeung ibadah sejenna. Ku kituna para Calhaj ti Kota Bandung kudu bisa ngalaksanakeunnana kalayan maksimal.
Dina usum haji 1440 Hijriah ieu, Oded katut garwa, Siti Muntamah Oded oge bakal ngalaksanakeun ibadah haji. Anjeunna ngagabung jeung rombongan Calhaj Kota Bandung kloter 86 sarta ngagabung jeung KBIH Daarut Tauhid. ( adar )
