Bandung, bewarajabar.com — Mapag milangkala ka 210 Kota Bandung 25 September 2020, Pemkot (Pamarentah Kota) Bandung nyawalakeun logo, tema, jeung tagline. Taun ieu tema nu diangkat aya patula patalina jeung perang Kota Bandung ngalawan Covid-19.
Taun samemehna temana nyaeta “Membangun Bersama Oded Yana: Kota Bandung yang Unggul, Nyaman, Sejahtera dan Agamis“. Taun ini, saluyu jeung Surat Edaran No. 003/SE.117-Bag.Kesra/IX/2020 ngeunaan mieling HJKB (Hari Jadi Kota Bandung) ka 210 Taun 2020, tema nu diusung nyaeta “Dengan Inovasi dan Kolaborasi, Kota Bandung Bergerak Melawan Pandemi Covid-19“. Sedengkeun taglinena nyaeta “Bersama Kita Tangguh“.
Sedengkeun logo HJKB taun ieu gambarna 210 dilengkepan tulisan “Bersama Kita Tangguh”. Bentukna buleud kana angka 2 jeung 0 ngagambarkeun Bandung nu dinamis, kolaborasi pikeun inovasi. Kakuatan Bandung digambarkeun ku angka 1 nu bentukna tungtung luhur atas Jembatan Pasupati warnana bendera merah putih ngagambarkeun sila katilu Pancasila turta kakuatan.
Sedengkeun garis-garis bodas nu motong angka 2 jeung 0 ngagambarkeun Pamarentah Kota Bandungngayomi tur ngalindungi wargana. Warna biru dina tulisan “Bersama Kita Tangguh” jeung koneng ngagambarkeun Kota Bandung nu mibanda komara. Warna hejo dina logo nggambarkeun Kota Bandung nu seger wedel ku inovasi. Napon warna beureum ngagambarkeun kawani ngalawan pandemi Covid-19.
RelatedPosts
Kepala Bagian Humas Setda Kota Bandung, Sony Teguh Prasatya nembrakkeun mieling HJKB taun ieu memang beda jeung taun-taun samemehna. Eta hal aya patula patalina jeung masih narebakna wabah Covid-19 di Kota Bandung. Ku kituna, tema taun ieu ngangkat tarekah babarengan sakumna elemen Kota Bandung ngalawan pandemi Covid-19. Lantaran salila ieu, Pemkot Bandung babarengan jeung warga geus nembongkeun ketakna dina inovasi tur kolaborasina pikeun megatkeun rante Covid-19.
Saniskara tarekah terus dilaksanakeun nepika Covid-19 bener bener leungit ti Kota Bandung. Sakumaha pada apal sakumna Forkopimda (Forum Koordinasi Pimpinan Daerah), tokoh masarakat, tokoh agama, pamuda, katut sakumna elemen masarakat babarengan merangan Covid-19. “Tagline ‘Bersama Kita Tangguh’ eta pikeun nembogkeun yen Pemkot Bandung katut sakum wargna moal eleh kana naon wae kaasup Covid-19. Eta hal bisa ngahudangkeun sumanget sarerea pikeun terus ngalaksanakeun protokol kasehatan,” tandes Sony.
Jeroning kitu, Walikota Bandung, Oded M. Danial nembrakkeun, filosofi nu kaunggel dina eta logo ngarupakeun identitas tur jiwa Kota Bandung kiwari. Sok sanajan lumangsung basajan, milangkala ka 210 Kota Bandung taun ieu tetep kudu aya ruhna sakumaha digambarkeun dina logo.
“Taun ieu teu ngareuah reuah sacara gede gedean, tai lumangsung basajan. Sok sanajan kitu, eta momentum nu sakral turta perlu diinget deui perjoangan karuhun urang dina ngawangun Kota Bandung,” tandes Oded.
Oded meredih sanajan basajan henteu ngaleungitkeun esensi tina mieling HJKB. Diharepkeun slogan “Bersama Kita Tangguh” bias ngawujud dina kahirupan sapopoe warga.
