BANDUNG, BEWARAJABAR.COM — Kurang-leuwih 800 urang mersihan Walungan Citarum Kolot di budeureun Batununggal, Ahad (27/10/2018). Asal sakabéhna ti anggota TNI, mahasiswa Institut Teknologi Nasional (Itenas), anggota Lembaga Dakwah Islam Indonesia (LDII), jeung aparat Kecamatan Bandung Kidul, Lengkong, jeung Kecamatan Bojongloa Kidul.
Ieu kagiatan ogé mangrupa bagéan tina upaya TNI manunggal bareng rahayat nyukseskeun program Citarum Harum. Camat Bandung Kidul, Evi Hendarin ngarasa kabantuan lantaran wewengkonna jadi titik pikeun kagiatan kebersékaan. Ku dukungan sagala pihak, inyana yakin walungan nu ngamalir ka Kota Bandung bakal leuwih beresih.
“Ieu kagiatan téh ngabantu wewengkon urang pisan. Komo deuih ku ayana bantuan pasukan ti LDII, mahasiswa jeung Séktor 22 Citarum Harum. Ieu téh sapamagodos jeung program pengelolaan sampah Pemkot Bandung, nyaéta Kang Pisman (Kurangi, Pisahkan, Manfaatkan). Kulantaran pasigeung langsung jeung kabersékaan lingkungan,” pokna.
Lian ti éta, Danséktor 22 Citarum Harum, Kolonél Inf Asep Rahman Taufik nguningakeun, kagiatan nu diiluan ku 800 urang éta téh kabagi tilu wewengkon kacamatan, nyaéta Kecamatan Bandung Kidul, Léngkong, jeung Kecamatan Bojongloa Kidul. “Urang saréréa babarengan turun ka walungan mulungan runtah, ngaberesihkeun jukut jeung kirmir. Ogé nyosialisasikeun sareng ngédukasi masarakat ngeunaan program Citarum Harum,” kitu kasauranana.
Asep nguningakeun yén éta kagiatan ogé jadi wayahna pikeun kampanyeu Kota Bandung ODF (Open Defecation Free) 100% di taun 2020. “Ieu kudu didukung ku sakabéh warga Kota Bandung. Salahsahijina nyieun septic tank di masing-masing imah, ogé ngadukung nyieun septic tank komunal. Ngarah warga teu miceun di walungan,” pokna.
Sajabana, Plt Ketua LDII Kota Bandung, Sunarya ngadugikeun, ku ilubiungna lembagana dina kagiatan éta, lantaran lembagana ngadukung program lingkungan hidup. “Sajalan jeung hasil Rakernas LDII taun 2018. Poinna téh pelestarian lingkungan. Ku kituna tingkat propinsi jeung kabupatén kota nepi ka cabang kudu ngalapkeunna. Ieu kagiatan téh nyaéta bentuk impleméntasi Rakernas mangrupa dukungan jeung rampak-gawé bareng jeung nu boga kapentingan,” pokna. (*)
Discussion about this post