Bandung-bewarajabar.com – Pelajar SMA/SMK sederajat sa Kota Bandung jeung Cimahi nu aya di lingkup KCD (Kantor Cabang Dinas) Wilayah 7 Dinas Pendidikan Provinsi Jawa Barat unjuk kabisa dina kagiatan Pesona Kreativitas Siswa 2019.
Kagiatan nu dilaksanakeun ku Majalah Sekolah Juara eta diiluan 80 sakola dina raraga milih siswa kreatif, lumangsung di Gedong Aula SMK Negei 9 Kota Bandung,Saptu (27/7/2019).
Ketua Pelaksana Pesona Kreativitas Siswa 2019 Rusyandi nembrakkeun, eta kagiatan ngarupakeun even nu dilaksanakeun enggoning ngawadahan potensi para siswa dina saniskara bidang ekstrakulikuler kreatif.
“Eta kagiatan ngarupaken tempat audisi nu dilaksanakeun pikeun ngawadahan potensi siswa dina bidang-bidang ekstrakulikuler kreatif. Tujuanna sangkan barudak nu salila ieu latihan ekstrakulikuler kreatif aya panggung lombana,” ceuk Rusyandi.
Rusyadi ngajentrekeun, aya sababaraha kategori ekstrakulikuler nu dilombakeun, diantarana modeling, seni tari, bela diri, akting, perkusi, penyanyi solo jeung sajabana. Para siswa nembongkeuen kabisana dihareupeun dewan juri pikeun jadi nu panghadena. “Hasilna dijaring nu meunang 10 besar. Maranehna bakal diilukeun dina lomba di tingkat Jawa Barat bulan Desember nu bakal datang, saingan jeung siswa ti sakuliah Jawa Barat,” pokna.
Salian di Kota Bandung jeung Cimahi, ceuk Rusyandi, eta kagiatan bakal dilaksanakeun disajumlah KCD sejenna, nyaeta KCD 6 ngawengku Kabupaten Bandung Barat jeung Cianjur, KCD 8 ngawengku Kabupaten Bandung jeung Sumedang, KCD 11 ngawengku Kabupaten Garut, sarta KCD 12 ngawengku Kabupaten jeung Kota Tasikmalaya.
Hasil lomba bakal dipilih tilu siswa panghadena nu jadi juara. Engkena eta siswa bakal narima hadiah sarta beasiswa kuliah pendidikan S1 di Universitas Sangga Buana.
Rusyandi nambahkeun, Pesona Kreativitas Siswa 2019 ngarupakeun kagiatan nu katilu kalina dilaksanakeun, sanggeus nu samemehna taun 2017 jeung 2018. Eta kagiatan bakal terus dilakasanakeun dina taun taun nu bakal datang. “Diharepkeun salian ti barudak meunang panggung tur jadi juara, maranehna leuwih kamotivasi deui dina berkreativitas jeung berkaraya,” tandesna. ( Dede R )
