Bandung, bewarajabar.com – Calon peserta didik anyar diperedih henteu hariwang, mun seug teu lulus seleksi PPDB (Penerimaan Peserta Didik Baru) 2019. Sabab, pengumuman kalulusan PPDB 2019 dilaksanakeun dua minggu samemeh penutupan pendaftaran ka sakola swasta.
Kitu diungkabkeun Tim Teknis PPDB 2019, Edy Purwanto. “Sakola swasta masih muka pendaftaran nepika 15 Juli 2019. Jadi, siswa masih ngabogaan waktu mun seug teu ditarima di jalur seleksi PPDB 2019,” pokna, sawatara waktu katukang.
Edy nandeskeun, ka calon peserta didik katut orang tua sangkan paham kalayan tembres aturan turta juknis (petunjuk teknis) ngeunaan PPDB 2019 pikeun ngaminimalisasi aya kasalahpahaman. “Lian ti sosialisasi nu dilaksanakeun, calon peserta didik diharepkeun neangan informasi sahade hadena,” pokna.
Jeroning kitu, Kadisdik Jabar (Kepala Dinas Pendidikan Jawa Barat), Dewi Sartika ngajentrekeun, taun ieu SMA (Sekolah Menengah Atas) jeung SMKN (Sekolah Menengah Kejuruan) Negeri di Jabar ngan mampuh nampung 34% calon peserta didik nu lulus di tingkat SMP (Sekolah Menengah Pertama). Sedengkeun 66% sejenna bakal ditarekahan neruskeun ka sakola swasta. “Mun seug sakola negeri geus nyumponan kuota tangtuna bakal dialihkeun ka swasta. Tangtuna loba sakola swasta nu mibanda kualitas hade di Jabar,” pokna.
Dewi Sartika nandeskeun, orang tua siswa teu perlu hariwang ngeunaan waragad di sakola swasta. Lantaran, sanajan statusna sakola masarakat, sabagian gede sakola swasta geus meunang dana tunjangan ti pamarentah. Kayaning, dana BOS (Bantuan Operasional Sekolah) jeung BPMU (Bantuan Pendidikan Menengah Universal). “Jadi, sakola swasta oge boga kawajiban narima maksimal 20% calon peserta didik ti keluarga ekonomi teu mampuh,” tandesna. (Rivai)
Discussion about this post