Bandung,bewarajabar.com. – Poe kahiji pelaksanaan Tes SKB (Seleksi Kompetensi Bidang) CPNS (Calon Pegawai Negeri Sipil) Kemenag Jabar Taun 2018 disambut antusias ku para peserta nu geus teu sabar pikeun neruskeun perjoangan jadi ASN (Aparatur Sipil Negara) di Kemenag Jabar, kagiatan lumangsung di UPI Bandung, Senin (17/12/2018). Antusias para peserta nu ngawengku ti sababaraha daerah eta nutupan rasa pesimis samalah maranehna katembong sarumanget.
Kakanwil Depag Jabar (Kepala Kantor Wilayah Kementerian Agama Prov. Jawa Barat), H. A. Buchori dibarengan Kepala Bagian Tata Usaha, H. A. Handiman Romdony ngilu ngarasakeun eta antusias. Ku kituna gura giru asup ka rohangan pikeun patepung langsung jeung para peserta.
REKOMENDASI
Dina biantarana H. A. Buchori nandeskeun yen pilihan jadi ASN lain pilihan nu sembarangan lantaran jadi ASN nyaeta nangtukeun kualitas kahirupan kahareupna. “Mun seug bapa atawa ibu jadi ASN ngan saukur miharep gajih jeung jabatan, hadena batalkeun eta niat ti ayeuna keneh lantaran jadi ASN merlukeun niat nu tulus tur ihlas,” pokna.
H. A. Buchori nembrakkeun, resiko nu bakal disanghareupan ku jadi ASN nyaeta lobana aturan nu kudu ditaati turta dilaksanakeun. “Samemeh kaduhung leuwih hade kaluar ti ieu rohangan,” tandesna.
H. A. Buchori nandeskeun konsekuensi jadi ASN nyaeta kahiji jangji ASN nu kudu sadia turta siap ditempatkeun dimana wae. “Hartina kudu siap dipindahkeun ka mana wae disakuliah Indonesia. Konsekwensi kadua nyaeta ASN kudu patuh tur taat kana Pancasila jeung UUD 1945, mun seug engkena aya ASN nu mengpar tina ideologi Negara Republik Indonesia tangtuna bakal ditindak saluyu PP No 53,” pokna.
H. A. Buchori ngingetkeun deui ka peserta yen jadi ASN nyaeta pilihan penting nu bener bener kudu dipikirkeun kalayan hade tur daria.
Mungkas biantarana H. A. Buchori miharep sangkan peserta ngajadikeun perjalanan tes CPNS eta ngarupakeun bagian tina ibadah ssangkan sagalana nu diniatkeun ibadah henteu mubadir sanajan hasilna henteu saluyu jeung harepan.
Pelaksanaan Tes SKD CPNS Kemenag Jabar Taun 2018 dilaksanakeun salila lima poe ti tanggal 17nepika 21 Desember 2018 di tilu tempat nu beda nyaeta Isola Resort Hotel, Auditorium JICA FMIPA, jeung Showroom FMIPA. Pikeun pelaksanaan wawancara jeung praktek kerja bakal ngalibetkeun 90 urang ngawengku Dosen UIN Sunan Gunung Djati Bandung, Widya Iswara BDK Bandung, Pejabat di tiap Satker sarta praktisi nu wedel di bidangna. ( Adar MAT )
