Soreang, bewarajabar.com — Di wewengkon leuweung tepatna kawasan destinasi Nyampay, reses Ketua DPRD Kabupaten Bandung H. Sugianto dilaksanakeun sacara out door di Kp. Ciparay, Blok Nyampai RW 07 Desa Indragiri Kecamatan Rancabali Kabupaten Bandung, sawatara waktu katukang.
Blok Nyampai ngarupakeun titik pelaksanaan kadua reses dina poe eta keneh, samemehna dilaksanakeun di Desa Cipelah Kecamatan Rancabali Kabupaten Bandung kalayan jumlah ondangan 125 konstituen. Acara diluuhan para tokoh agama, masarakat, unsur pemuda, para Ketua RW/RT, sarta unsur pamarentah desa.
Salah saurang peserta reses di Desa Cipelah Ayi Wahyudin ka Ketua DPRD Kabupaten Bandung meredih sangkan warga nu ngarangluh difasilitasan tumali jeung jeung miara pangwangunan infrastruktur nu dilaksanakeun pamarentah utamana sektor infrastruktur jalan, nu miarana teu katembong aya ti Dinas PUTR. “Warga miharep aya kajelasan dina miarana, boh kirmir kitu deui sepadan jalan, sangkan anggaran nu dilarapkeun di eta lokasi teu percumah, saha sabenerna nu tanggung jawab naha pihak PUTR, kacamatan atawa pamarentah desa atawa warga sabudeureunnana,” pokna.
Sedengkeun warga Desa Indragiri Kec. Rancabali Kab. Bandung ngungkabkeun kahayang masarakat, tumali jeung ngaronjatkeun infrastruktur jalan, boh jalan desa, kabupaten jeung hususna akses jalan ka wisata edukasi Nyampai, sangkan bisa ngarobah turta ngaronjatkeun perekonomian masarakat.
RelatedPosts
Ketua DPRD Kabupaten Bandung H. Sugianto nembrakkeun, dina reses kadua eta ngayakeun terobosan anyar sarta ngahaja dilaksanakeun sacara outdoor, di area terbuka tangtuna impian nu geus kabayang di pamarentah Desa Indragiri katut masarakatna. “Tangtuna ngarasa reueus, geus lila ngadenge yen Nyampai bakal jadi salah sahiji destinasi wisata edukasi kalayan panorama alamna lega sarta hawana tiis dipirig ngamparna kebon enteh nu kacida legana,” pokna.
Salian ti kitu, ceuk Sugianto, sawaktu dilaksanakeun rakor pemasaran pariwisata jeung Disparbud Kab. Bandung aya patula patalina jeung desa-desa nu tumuwuh tur mekar ngadorong tur nyiptakeun obyek wisata anyar. “Mun seug geus jadi tujuan wisata boh pemuda, masarakat sarta wisatawan luar bakal nyiptakeun karaharjaan perekonomian masarakat, turta eta tangtuna kudu dirojong ku akses infrastruktur sangkan wisatawan gampang nepi ka lokasi wisata edukasi Nyampai,” tandesna.
