Soreang, bewarajabar.com — Ketua DPRD Kabupaten Bandung Sugianto miharep Pemkab Bandung dina ieu hal Disparbud (Dinas Pariwisata & Kebudayaan) Kab Bandung ngaoptimalkeun kalayan daria dina ngamumule situs-situs bersejarah di Kabupaten Bandung. Salah sahijina situs Nagara Padang, di Desa Rawabogo, Kecamatan Ciwidey, Kabupaten Bandung.
Eta hal diungkabkeun Sugianto sawaktu reses di Nagara Padang, sawatara waktu katukang. Sarana pangrojong infrastruktur jalan ka lokasi situs eta kudu diprioritaskeun sangkan nu ngadarongdon ngaronjat turta ngarasa tumaninah sawaktu ngajugjug ka lokasi. “Nagara Padang ngarupakeun salah sahiji situs sajarah jeung situs budaya nu aya di wewengkon Kabupaten Bandung nu payus dijaga tur dimumule,” pokna.
Nurutkeun Sugianto, sanggeus ngadenge penjelasan ti kasepuhan, nyatana Nagara Padang wedel ku filosopi dina kahirupan manusa boh individu, keluarga kitu deui kapamingpinan nu payus jadi conto. “Salila ieu loba tokoh adat, seniman tur pelaku seni budaya nu ngarangluh, yen Disparbud kurang nyaah turta kurang ngabina seni budaya lokal di Kabupaten Bandung turta leuwih ngaheulakeun seni budaya luar,” tandesna.
Padahal, ceuk Sugianto, aya ratusan sanggar seni budaya di Kabupaten Bandung sumebar ampir di unggal kacamatan nu geus kawentar di tingkat nasional. Kaasup salah sahijina Situs Nagara Padang nu geus kawentar di Nusantara.
Gunung Padang atawa Pasir Pamipiran disebut-sebut dina Sejarah Kerajaan Galuh 536–852 Masehi. Gunung ieu dipiwanoh jadi tempat tapa Prabu Premana Dikusuma (Ajar Sukaresi, Resi Ajar Padang, Bagawat Sajala-jala) nu marentah 703 M. Catatan sajarah budaya nembongkeun dina mangsa pamarentahan Prabu Premana Dikusuma kajadian parebutan kakuasaan.
Parebutan kakuasaan eta nepika dipatenina Premana Dikusuma ku Sang Tamperan (Patih Galuh harita), jalma nu dipercaya pikeun ngajalankeun kakuasaan sawaktu Raja keur tapa. Kajadian dipatenina di Gunung Padang. Lokasi Gunung Padang nu dimaksud aya di Galuh lebah kulon (Pamana Sunda, wates Sunda, deukeut Walungan Citarum). Dongen dipatenina eta ditulis dina Pantun Ciung Wanara, jeung Babad Kerajaan Galuh.
Eta lokasi kiwari aya di Gunung Padang nu disebut Situs Nagara Padang, di Desa Buni Nagara, Kecamatan Singdangkerta, Kabupaten Bandung Barat kiwari. Samemeh pamekaran Bandung Barat, ayan eta situs asup wewengkon Kabupaten Bandung. Situs Nagara Padang kiwari dilola ku para juru kunci di Desa Rawabogo, Kecamatan Ciwidey, Kabupaten Bandung.
