Karawang, bewarajabar.com — Jalan nu ngahubungkeun patalimarga warga RW 05 Kampung Karajan jeung warga RW 02 Kampung Kareo Desa Pacing Kecamatan Jatisari, Karawang, kungsi bisa diliwatan mobil treuk “colt diesel”. Kadieunakeun ukur bisa diliwatan roda dorong. Ayeuna jalan teh dilegaan deui sarta sisi irigasi tertierna “diturap” ku Pemerintah Desa Pacing.
“Lebah sisi lembur Kareo, kantos motor nu paliwat sareng motor deui ampir pagesrek, bakat ku heureut jalanna,” ceuk Amar salah saurang warga Kampung Karajan.
“Nu ngabalukarkeun heureutna jalan teh, kahiji, solokan (saluran tertier) sapanjang sisi eta jalan rarempag (erosi), ngalegaan. Kadua, sisian jalan palih wetan nu napel wates sareng sawah, unggal usum nyawah ditampingan (disempogan) bari henteu dipopok deui,” ceuk Amar deui.
Lian ti heureut, eta jalan oge henteu dicor. Usum hujan jalan teh biasana jeblog pisan, teu bisa diliwatan kandaraan. Mun warga RW 05 Kampung Karajan hayang ka RW 02 Kampung Kareo make kandaraan, kudu nguriling ngaliwatan RW 04 Kampung Karajan, kudu ngaler, ngulon, ngidul, ngetan nu jauhna sababaraha tikel dibanding ngaliwatan ieu jalan.
Bareto kungsi kajadian hujan terus-terusan. Warga RW 05 Kampung Karajan nu rek ka RW 04, meuntas sasak nu kakerem ku cai walungan Kalenwaru nengah bitis. Malahan kungsi leuwih ti kitu. Maranehna ngarasa paur kaceot kabawa cai walungan, sabab laju cai luhur sasak kenceng pisan.
“Patalimarga peryogi pisan kanggo warga Karajan, margi Karajan lian ti sentra pare oge sentra sayuran palawija sareng sentra supa. Alhamdulillah jalan teh ayeuna dilegaan deui. Saurna taun payun bade dicor,” ceuk Amar mungkas obrolan
