Karawang, bewarajabar.com — Di Desa Segaran Kecamatan Batujaya, Kabupaten Karawang, pasir-pasir leutik nu ku warga di dinya disebut “unur” (basa Melayu Betawi dialek Karawang), sumebar di antara amparan sawah. “Unur” dina basa wewengkon Karawang disebut “hunyur”.
Lamun ditarik lempeng kaler-kidul, tembong “unur” pangjangkungna di beulah kidul ampir 8,08 meter tina beungeut sawah, sedengkeun “unur” panghandapna di beulah kaler jangkungna 3,75 meter tina beungeut sawah.
Umumna “unur-unur” teh dipelakan tangkal cau, gedang, boled, jeung nu sejenna. Di jero “unur” rata-rata aya tumpukan bata nu memeh taun 1985 taya nu nyangka yen eta teh bangunan candi. Eta tumpukan bata gampang kapanggih dina gundukan taneuh, ukur dikoreh saeutik ku dampal suku. Di salah sahiji “unur” kapanggih hiji candi nu ayeuna disebut Candi Jiwa.
Waktu eta candi dibangun di jaman Karajaan Tarumanagara, lokasi kompleks candi anu ayeuna sacara administratif kaasup Kecamatan Batujaya, Kabupaten Karawang, pernahna di basisir, 0 meter tina beungeut laut. Lokasina teu jauh ti muara walungan Citarum. Tapi ayeuna kompleks candi Batujaya teh luhurna 2 meter tina beungeut laut.
Candi Jiwa geus rengse “diekskavasi” ku Jurusan Arkeologi Fakultas Sastra dan Budaya Universitas Indonesia (UI). Candi bata nu legana 19 x 19 meter sarta jangkungna 4,7 meter teh bagian bangunan pangluhurna mirip kembang tarate nu keur mekar.
Candi-candi nu dijieun tina bata teh warnana bodas, sabab dilapis ku stuko (stucco), make batu kapur. Tehnologi “lepa stuko” geus dipiwanoh sarta jadi salah sahiji kaahlian tehnik sipil di Karajaan Tarumanagara.
Nu matak kataji, tehnologi “beton tak bertulang” jaman harita geus dipake, utamana di bagian-bagian palataran candi nu kudu teuas. Beton stuko nu dicampur batu karikil ngahasilkan adukan nu kacida kuatna. Sabenerna ayeuna oge, semen bahan utamana batu kapur 75-80 %, ditambah taneuh lempung, keusik silika jeung gips.
Di kompleks candi Batujaya aya leuwih ti 24 candi bata. Pikeun melester sakabeh bagian candi diperlukan bahan nu kacida lobana, nyaeta batu kapur tea. Kapur tohor (quicklime) asalna tina batu gamping sanggeus dipanaskeun atawa “kalsinasi”. Batu kapur teh dibeuleum dina suhu antara 600-900 darajat C.
Lamun kapur tohor dicaian sacukupna bakal ngahasilkeun kapur padam (hydrated/slaked quicklime). Kapur tohor nu pangalusna nyaeta nu kabeuleum saeutik, nu hasil kapurna teu pati ngariut. Sedangkeun kapur tohor nu kurang alus nyaeta nu asak teuing dina meuleumna, nu balukarna kapurna ngariut.
Lamun hiji candi merlukeun pangsaeutikna antara 30-35 kubik kapur padam, pikeun 24 candi tangtu merlukeun 24 x 35 kubik = 840 kubik. Tangtuna oge, jumlah kapur padam nu diperlukeun leuwih loba, sabab jumlah candi pasti leuwih ti 24. Lian ti eta, unggal candi merlukeun beton stuko pikeun neuaskeun palataran candi, tangtuna jumlahna jadi nambahan.
Ti mana eta bahan batu kapur teh? Di abad ka-5 di Karajaan Tarumanagara tangtu geus loba ahli nu pagaweanna alus pikeun ngabangun kompleks candi, saperti ahli geologi nu bisa neangan sumber bahan, ahli ngagali nu nyaho cara ngalola batu supaya jadi kapur tohor/ kapur padam, ahli transportasi nu bisa ngakutan bahan tina pameuleuman ka pusat kompleks candi, ahli teknik sipil nu bisa ngabangun candi kalayan hade dumasar aturan harita, nyieun beton stuko, ngalepa stuko, nepi bangunan candi jadi bodas tur kuat, ahli patung, ahli desain eksterior, nepi ka “materai” (votive tablet) taneuh liat arca.
Sumber bahan biasana dipilih dumasar dua hal utama, nyaeta kualitasna alus jeung gampang dibawana. Batu kapur bahan lepa jeung beton tangtu diproses di lokasi bahan baku, hasilna mangrupa kapur padam nu diakutan ka lokasi pangwangunan candi.
Lokasi sumber bahan nu saluyu jeung eta dua sarat nyaeta pasir kapur nu ayeuna dipiwanoh Kars Pangkalan. Ieu daerah batu gamping ayana di 27 km beulah kidul Kota Karawang. Kars Pangkalan mangrupa pasir kalayan ponclot-ponclotna, nyaeta, Guhawalet, Pasirlengis jeung Leuweungsurupan. Batu gamping di Pangkalan aya dua rupa, kahiji, batu gamping nu aya keusikan nu cadanganna teu pati loba, kadua, batu gamping murni nu aya di Guhawalet nu sipatna kompak, teuas, bodas semu kulawu, sarta cadanganna bisa nepi ka puluhan ton.
Kars Pangkalan kaasup Formasi Perigi, ngembat ti wetan ka kulon sajajar jeung garis basisir. Sacara Geologi, umurna antara 10-15 tahun. Waktu Karajaan Tarumanagara ngabangun kompleks candi Batujaya, ieu daerah pasir jangkungna antara 48-118 meter tina beungeut laut. Ayeuna antara 50-120 meter tina beungeut laut.
Daerah Kars Pangkalan nu panjangna 20 km teh digendeng ku dua walungan. Di beulah kulon walungan Cibeet, di beulah wetan walungan Citarum. Ieu dua walungan jadi sarana tranportasi nu hade pikeun ngakutan kapur tohor/padam ka Batujaya nu anggangna 62 km.
Daerah batu gamping nu aya di Desa Tamansari, Kecamatan Pangkalan ajenna beuki ngaronjat, sabab lian ti kualitas karsna kaasup kelas hiji, saperti nu kacatet dina Peta Klasifikasi Kawasan Kars Provinsi Jawa Barat tahun 2006, oge ieu daerah kaasup situs sajarah Karajaan Tarumanagara.
Dumasar Peraturan Gubernur Jawa Barat Nomor 20 Tahun 2006, ieu kawasan kars kelas I mangrupa daerah nu wajib ditangtayungan jeung teu meunang dipake kagiatan budidaya nu ngarusak fungsina. Pasal 13 dina eta Pergub ditetelakeun yen daerah kars kelas I kaasup kawasan lindung, nu bisa dimangpaatkeun, tapi kawatesanan ku kagiatan nu sipatna teu nurunkan kualitas lingkungan jeung biofisik.
Hal ieu saluyu jeung kriteria daerah kars kelas I, saperti nu kacatet dina Keputusan Mentri Energi dan Sumber Daya Mineral Republik Indonesia No. 1456K/20/MEM/2000, nu mangrupa kawasan lindung sumber daya alam dan budaya, teu dimeunangkeun ayana kagiatan ngagali.
Daerah Kars Pangkalan ajenna alus pisan, boh sacara alam boh budaya. Batu gampingna diolah jadi kapur tohor/padam, jadi sumber bahan pagwangunan kompleks candi Batujaya di Karajaan Tarumanagara, candi bata pangkolotna di Indonesia nu dilepa stuko.
