Karawang, bewarajabar.com — Kolam renang ‘Tirta Winaya’ milik KPRI Kanca Winaya, Koperasi Guru Kecamatan Klari nu anggotana guru-guru SD jeung Tenaga Kependidikan UPTD Pendidikan Kecamatan Klari jeung guru-guru SD nu tempat gawena asalna memeh pamekaran aya di wilayah Kecamatan Klari, nyaeta sabagian guru ti Kecamatan Purwasari, Majalaya jeung Karawang Timur, Kabupaten Karawang.
Memeh aya virus corona pengunjung atawa nu ngadon ngojay di ‘Tirta Winaya’ lamun keur rame dina sapoena bisa nepi ka 1.000 urang, nyaeta, masarakat umum nu ngadon pelesir jeung para siswa nu dibingbing ngojay ku guruna dina pangajaran PJOK (Pendidikan Jasmani Olahraga dan Kesehatan). Ramena utamana, masarakat meumeujeuhna usum arulin, sakola pas rengse sagala kagiatan.
[irp]
Mangsa sakola keur loba kagiatan, diantarana: O2SN (Olimpiade Olahraga Siswa Nasional), FLS2N (Festival Lomba Seni Siswa Nasional), Lomba Akademik, Sapta Lomba, Try Out Ujian SD, PTS (Penilaian Tengah Semester) biasana pengunjung rada ngurangan.
“Upami nuju seueur kagiatan di sakola, pengunjung ‘Tirtawinaya’ rada ngirangan. Jumlahna, dinten-dinten biasa, Senen-Saptu antara 100-200 urang, dinten Minggu antara 400-600 urang. Tiket dinten biasa Rp 10.000,-, Minggu Rp 15.000,-” ceuk Darman, salah saurang petugas ‘Tirta Winaya’ nu tanggung jawabna ngawaskeun kolam, ngajaga kasalametan nu ngarojay, nalika ngobrol jeung Bewara Jabar anyar-anyar ieu.
Dina poe-poe biasa, nu ngarojay di ‘Tirta Winaya’, lian ti masarakat umum, oge para siswa SD biasana 2-4 kali dina sataun, para siswa SMP/SMA biasana 8-10 kali dina sataun. Poe minggu, lolobana masarakat umum jeung para siswa SMP/SMA ti luar kota, diantarana ti Purwakarta.
[irp]
Kolam renang ‘Tirta Winaya’ pernahna sisi Jalan Raya Jurusan Kosambi-Curug, di Dusun Manggabesar, Desa Walahar, Kecamatan Klari, di wilayah zona industri Karawang nu jalanna rame ku kandaraan isuk-isuk jeung sore mangsa para karyawan pabrik miang jeung mulang gawe.
