Karawang, bewarajabar.com — Unggal malem Salasa, malem Saptu jeung poe Minggu, aya acara pagelaran siaran hidup seni tradisional di Radio AM 14,75 Sturada (Studio Radio Daerah) Pangkal Perjuangan Karawang, nyaeta: malem Salasa Topeng Banjet atawa Jaipongan, malem Saptu Wayang Golek, poe Minggu Kacapi Kawih.
Siaran hidup di Sturada pikeun grup-grup seni di Karawang mangrupa media promosi nu kacida “manjurna” beh dituan mah, jaman televisi ngan TVRI wungkul, sabab lian ti TV, radio mangrupa media hiburan nu dominan di masarakat di jaman harita.
Radio Sturada bisa dianggap media “pengembang bakat” pikeun para seniman Karawang. Salah sahiji seniman Karawang nu asalna pamaen Tunil, tuluy ngagabung di “Jayakarta Group”, Jakarta, sarta jadi seniman lawak nasional, nyaeta Jojon. Inyana, asalna ti Cijambe Kecamatan Telukjambe.
Kitu ditetelakeun ku penyiar Sturada nu harita geus leuwih ti 30 taun siaran di ieu radio, Iding Karta Wijaya, nalika ditepungan di Sturada, Jl. Brigpol Nasuha 2, Alun-alun Karawang sawatara taun katukang.
“Hanjakal, nalika para seniman Topeng Banjet bade direkam ku TV Indosiar, teu saranggemeun. Lalakon dina Topeng Banjet rata-rata carita silat. Dialogna ku basa wewengkon Karawang. Mungkin kumargi teu aya nu ngabina ngagunakeun basa Sunda nu umum, aranjeunna teu siap pinton di TV,” ceuk Iding.
Nu biasa mintonkeun carita drama rumah tangga nyaeta pamaen Topeng Banjet almarhum Ali Saban jeung Bi Ijem. Nalika jumeneng aranjeunna geus biasa pinton dina wangun dialog basa Sunda umum (basa lulugu) tur direkam dina kaset audio. Harita kasetna laku pisan di Karawang.
Seniman sejenna, Dalang RH. Cecep Supriyadi jeung Juru Kendang Jaipong H. Suwanda, dua diantara para seniman nu kakoncara nu kungsi icikibung di Sturada. Jadi, pantes mun Sturada mangrupa tempat ngamalirkeun bakat seni tradisional di Karawang. Kitu ceuk Iding Karta Wijaya.
Kiwari Radio AM 14,75 Sturada Pangkal Perjuangan di Jalan Brigpol Nasuha 2 Alun-alun Karawang jadi panineungan. Bangunanna jadi bagian ti bangunan Kantor Disparbud (Dinas Pariwisata dan Kebudayaan) Kabupaten Karawang. Alamatna ganti, freqwensina ganti, para penyiarna ganti, wanda acarana ge ganti. Kiwari taya acara siaran hidup seni tradisional Karawang.
