Karawang, bewarajabar.com — Situ Cipule dipake lomba dayung dina SEA Games ka-26, mangrupa bagian tina puseur kagiatan SEA Games di Palembang jeung Jakarta, 11-22 November 2011. Kangaranan aya kagiatan olah raga tingkat Asia Tenggara, pantes mun ieu situ loba nu ngajugjug. Jalma-jalma daratang ti mana-mana, lalajo acara nu kacida rohakana. Rebuan jalma ngaleut ngeungkeuy ngabandaleut ngembat-ngembat nyatang pinang, ngajugjug puseur kagiatan lomba di Situ Cipule lebah Kampung Ciampel, Desa Mulyasari Kecamatan Ciampel.
Situ Cipule nu pernahna di sisi Citarum sapanjang Kampung Cipule, Kampung Kaum, Kampung Ciampel jeung Kampung Kampungsawah teh ti mimiti SEA Games, tempat nu pang ramena nyaeta lebah Kampung Ciampel, tempat finish lomba, henteu di Kampung Cipule cara sawatara kagiatan waktu katukang.
[irp]
Ku ayana eta kagiatan, warga Ciampel jeung sabudeureunna asa kagunturan madu kaurugan meunyan putih majar teh, utamana nu daragang, dumeh daganganna laku, bakat ku loba jalma. Nu jelas, poe katilu SEA Games, poe Minggu, nu ngecer bengsin “ledis”, dibareuli ku nu make motor nu kacida lobana.
Kitu deui nu ngalola parkir kandaraan. Di unggal lolongkrang tempat, diantara imah warga nu aya sisi situ dipake tempat parkir. Maranehna milu kabanjiran rejeki. Unggal tempat rata-rata beubeunangan leuwih ti sajuta dina poe eta.
Tapi, pikeun nu mawa kandaraan mah lain kagunturan madu kaurugan menyan putih. Lolobana maranehna “kagunturan kesang, kaurugan ku kabingung” …. balukar macet. Dua titik macet nyaeta, lebah jalan ngajugjug puseur kagiatan (Kampung Ciampel) sapanjang lembur-lembur sisi situ (Kampung Cipule, Kampung Kaum, Kampung Ciampel, Kampung Kampungsawah) jeung sabudeureun Bendungan Walahar (tapel-wates Desa Kutapohaci Kec. Ciampel jeung Desa Walahar Kec. Klari).
[irp]
Di jalan teu jauh ka lokasi lomba, aya awewe asal ti Subang mawa budak leutik boncengan dina motor jeung salakina. Ku sabab macet, hawa panas, budak teh ceurik. Eta awewe turun tina motor, seseleket leumpang mapay sisi jalan ngajugjug lokasi lomba. Reureuh di pos ronda sisi jalan. Amprok deui jeung salakina sanggeus 4 jam. Kitu diantarana salah sahiji kajadian nu dicaritakeun ku salah saurang warga Ciampel.
[irp]
Lebah Bendungan Walahar, kandaraan motor rata-rata meuntas bendungan kudu ngantri antara 2-3 jam. Kandaraan nu mulang ti lokasi jeung nu ngajugjug lokasi “bentrok” ngabalukarkeun macet ti memeh lohor nepi ka bada magrib.
Nu ngecer bengsin tea, di sapanjang jalan antara Desa Kutapohaci jeung Desa Mulyasari, dagangan bengsinna “ledis” teh ku sabab laku jeung teu bisa balanja deui ka pompa bensin nu pangdekeutna di Klari, sabab macet, boh jalan kaler boh jalan kidul.
[irp]
Aya 3 madhab asal datangna jalma-jalma ngajugjug Situ Cipule, ti kaler, ti kidul jeung ti kulon. Ti kaler, nu ngaliwatan Bendungan Walahar, asalna ti nu datang ngaliwatan jalan Pantura, ti gerbang tol Karawang Timur jeung ti warga kalereun jeung wetaneun Ciampel model Klari, Telagasari, jsb.. Ti kidul, nu ngaliwatan Bendungan Curug, asalna ti nu datang ngaliwatan Purwakarta atawa ti Klari nu jalan kidul. Ti kulon, nu ngaliwatan jalan sapanjang Kalimalang, asalna ti nu datang ngaliwatan gerbang tol Kawasan Industri (Karawang Timur 2), ti Telukjambe, jsb.
Nu ti luar kota lolobana datang ti gerbang tol Kawasan Industri tuluy mapay jalan sisi Kalimalang. Mun teu macet di lembur lebah lokasi, ti Bandung sajam leuwih, ti Jakarta kurang ti sajam biasana nepi ka lokasi.
[irp]
Kecamatan Ciampel, tempat Situ Cipule, mangrupa pamekaran ti Kecamatan Telukjambe nu ayeuna Telukjambe teh dimekarkeun deui jadi Telukjambe Timur jeung Telukjambe Barat. Bihari, mun nyarita sual Ciampel biasana jalma sok nanya, “Di mana Ciampel teh”, sabab jarang nu apal. Kiwari, Ciampel kaceluk ka awun-awun kakoncara ka janapria, majar teh, dumeh diberitakeun wae di koran, di TV, di internet, jsb.
