Karawang, bewarajabar.com — Di nagara Magada Bangbang Somantri nyanghareupan raja-raja sewu nagara nu ngalamar Dewi Citrawati sarta rek ngancurkeun Magada dumeh maranehna ngadenge yen Dewi Citrawati narima lamaran Prabu Arjuna Sastrabahu ti nagara Maespati. Sakabeh raja taluk, eleh ku kasaktian Bangbang Somantri.
Waktu istrirahat jeung para panakawan, Bangbang Somantri nembrakeun yen dirina jangji rek babakti ka raja nu leuwih sakti ti dirina. Ku kituna Bangbang Somantri nitip surat ka utusan nu eusina ngeunaan jangji dirina sarta miharep Prabu Arjuna Sastrabahu nyokot sorangan Dewi Citrawati sakaligus ngabuktikeun yen dirina henteu salah babakti.
Prabu Arjuna Sastrabahu paham yen Bangbang Somantri teu boga maksud nangtang parentah, tapi pikeun nedunan sumpah nu geus meungkeut dirina. Prabu Arjuna Sastrabahu miang diiring ku pasukan Maespati, nepungan Bangbang Somantri nu ngajak ngadu kakuatan.
Perang tanding antara Prabu Arjuna Sastrabahu jeung Bangbang Somantri saimbang. Bangbang Somantri ngaluarkeun senjata pamungkas nyaeta “konta baswara”. Prabu Arjuna Sastrabahu curiga yeh Bangbang Somantri lain rek nguji tapi rek mateni dirina.
Sang Prabu ambek, tuluy dirina ngaluarkeun ajian Tiwikrama jadi Brahalasewu. Awakna jadi sagede gunung, leungeunna jadi sarebu, nyekel rupa-rupa senjata. Bangbang Somantri dirawu teu walakaya, menta ampun. Bangbang Somantri dileuspaskeun, Sang Prabu robah ka wujud asal.
Bangbang Somantri sujud tanda taluk. Prabu Arjuna Sastrabahu narima kalawan sarat Bangbang Somantri kudu bisa mindahkeun Taman Sriwedari ti gunung Untarayana ka nagara Maespati minangka hukuman kana kalakuan Bangbang Somantri. Bangbang Somantri bingung, sabab moal mungkin kahayang Sang Prabu bisa kalaksanakeun.
Keur kitu datang Sukrasana adi Bangbang Somantri nu wujudna buta cebol, beungeutna goreng rupa. Ngadenge ngangluhna Bangbang Somantri ngeunaan hukuman Sang Prabu, Sukrasana nyanggupan ngalaksanakeun eta hukuman.
Ku kasaktianna nu luar biasa Taman Sriwedari dipindahkeun ku Sukrasana ti gunung Untarayana ka nagara Maespati. Tuluy kadenge ti kajauhan rombongan raja nu datang pikeun nyaksian kaendahan Taman Sriwedari nu aya di wilayah Maespati.
Bangbang Somantri gugup sabab aya Sukrasana adina. Manehna hariwang sabab wujud adina goreng rupa. Utamana Bangbang Somantri sieun kanyahoan ku raja yen nu mindahkeun taman teh lain dirina tapi adina. Lamun raja nanya ka Sukrasana pasti bakal dijawab saujratna. Bangbang Somatri nyaho sipat adina nu tara bohong.
Bangbang Somantri menta Sukrasana sangkan nyingkah heula, tapi Sukrasana tetep embung nyingkah sabab manehna hayang salawasna deukeut jeung lanceukna nu dipikadeudeuh, sieun ditinggalkeun cara waktu lanceukna indit ka Maespati.
Rombongan raja mingkin deukeut. Sukrasana tetep teu daek nyingkah. Ahrirna bangbang Somantri boga niat rek nyingsieunan adina ku cara nodongkeun senjata “konta baswara” maksudna supaya adina nu ogoan teh nyingkah.
Tapi, Sukrasana lain nyingkah, dirina malah nangkeup lanceukna. Bangbang Somantri teu nyangka kana tindakan adina. Senjata konta nanceb kana dada Sukrasana. Saharita Sukrasana perlaya. Bangbang Somantri kaget, ngajerit nangkeup layon adina. Manehna ceurik balilihan bari nangkeup layon adina. Najan adina goreng rupa tetep dipikadeudeuh.
Tuluy layon Sukrasana leungit. Kadenge sora tanpa wujud, sora Sukrasana. Eta sora netelakeun yen dirina baris terus nungguan Bangbang Somantri sarta nyupata kataledoran Bangbang Somantri, jaga Bangbang Somantri baris ajal ku raja angkara sarta dirina bakal ngajemput lanceukna pikeun bareng ka alam baka.
Kitu lalakon “Sukrasana Lena” nu dipedar ku dalang Akmal Nurwenda, dalang muda ti Karawang dina acara “Festival Dalang Muda Nasional Taun 2020” sacara virtual nu diselenggarakeun ku Disparbud (Dinas Pariwisata dan Kebudayaan) Provinsi Jawa Barat, dilaksanakeun ku Disparbud Kabupaten Karawang di aula Disparbud, Jalan Alun-alun Karawang, Jumaah (23/10/2020) nu anyar kaliwat.
Acara dibuka ku Kepala Disparbud Karawang, Yudi Yudiawan, SE, MM, dihadiran ku rengrengan Disparbud Karawang, Ketua Pepadi Jabar (Persatuan Pedalangan Indonesia Jawa Barat) H. Darsa Wibiksana, Sekjen Pepadi Jabar Dr. Fadjri Rizkyanti, M. MPd. katut rengrengan, Ketua Pepadi Karawang Waya Karmila, S. Pd., MM. katut rengrengan, Kepala Disdikpora Kabupaten Karawang, Drs. Asep Junaedi, M.Pd. katut nu sejenna.
Nurutkeun pelatih dalang Karawang, Iman Rohendi, aspek pertunjukan festival nu diniley, nyaeta: Lakon/Cerita, Catur/Dialog, Sabet, Penguasaan Karawitan Pedalangan jeung Video Pertunjukan. Dalang nu jadi wawakil Jabar ti Karawang nyaeta Akmal Nurwenda (16 taun) siswa Kelas 1 SMKN Karawang.
