Udug-udug Kungsi Jadi Puseur Dayeuh Karawang

oleh

Karawang, Bewarajabar.com — Udug-udug salah sahiji kampung di Desa Mulyasejati, Kecamatan Ciampel, Kabupaten Karawang, kampung sejenna, Pasirpogor, Asem, Cangkores, Karanganyar, Pasirjengkol, Citalahab, Koja, Sukamanah, Liosari, Pasirluhur, Jangga, Cisaga, Sukasari, Karapyak, Patunjang, Cibungkul, Cibonceret, Cikeruh, Jatinunggal, Cikarang jeung Ciawitali.

Nurutkeun Suryana, warga Desa Mulyasejati, nu kiwari wewengkon Desa Mulyasejati, bihari Kampung Udug-udug, bagian ti leuweung Kutatandingan. Nu munggaran muka leuweung tur ngajadikeun lembur Udug-udug akina pituin.  Harita di Udug-udug ukur aya imah hiji nu dieusi ku akina Suryana, Ki  Hatam jeung bapana, Lurah Oyi, nu kungsi jadi Kades Mulyasejati.

Di Karawang, mun jalma ngadenge kecap Udug-udug, manehna langsung ngabayang, hiji lembur singkur luhur pasir sisi leuweung, jauh ka bedug anggang ka dulag. Mun heureuy teh, “Abdi mah tebih ti Udug-udug,” cenah.

Tapi ayeuna, di Udug-udug geus aya jaringan telepon, jalan ka Udug-udug geus dihotmix jeung dicor, tanah antara Udug-udug jeung leuweung Kutatandingan geus jadi tanah industri.

Dina sajarah Karawang disebutkeun, bihari  Udug-udug kungsi jadi puseur dayeuh Kabupaten Karawang. Tapi, kiwari can katalungtik dimana lebahna puseur dayeuh teh. Taya titinggal sajarah nu nuduhkeun lebah puseur dayeuh Kabupaten Karawang di Udug-udug nu pasti.

Nu aya, hiji makam nu dikaramatkeun di Kampung Udug-udug kuloneun imah Suryana. Eta makam ku urang dinya disebut “Karamat Udug-udug”. Nurutkeun para sepuh eta teh makam Embah Dalem Puspakerti. Saha Puspakerti teh? Urang talungtik.