Pangandaran, bewarajabar.com – Kagiatan Gowes Kemerdekaan nu diayakeun ku PT Pindad (Persero), diiluan 600 peserta kalayan rutena Tasikmalaya-Pangandaran, Minggu (25/8/2019) nu kaliwat.
Para peserta nyorang jarak 100 KM, start di Makodim 0612/Tasikmalaya sarta finish di Pantai Timur Pangandaran, Jawa Barat.
Direktur Utama PT. Pindad (persero) Abraham Mose nembrakkeun, eta kagiatan ngarupakeun tarekah ngawanohkeun potensi pariwisata basisir Pangandaran nu kiwari keur dibebenah ku pamarentah.
Nurutkeun Abraham, eta kagiatan geus dilaksanakeun katilu kalina salila tilu taun katompernakeun, ngarupakeun bentuk rojongan pamarentah pikeun ngaronjatkeun wisata lokal hususna Pangandaran, nu kiwari keur digenjot pamatentah jadi destinasi wisata dunia.
Kagiatan diluuhan Wakil Kepala Staff Angkatan Darat (Wakasad), Letnan Jenderal TNI Tatang Sulaiman, Direktur Utama (Dirut) Pindad, Ir. Abraham Mose, Pangdam III/Siliwangi Mayjen TNI Tri Soewandono, Kapolres Ciamis, katut para peserta sejenna.
Wakasad Letjen TNI Tatang Sulaeman, ngebrehkeun kagiatan Gowes Kemerdekaan ieu dilaksanakeun dina raraga ngareuah reuah HUT (Hari Ulang Tahun) Kemerdekaan Republik Indonesia nu ka 74. ”Gowes Kemerdekaan ieu ngarupakeun salah sahiji bentuk sinergitas antara TNI jeung Polri, sarta warga masarakat. Tangtuna kajalin silaturahmi nu hade tur harmonis nu salila ieu kajalin,” pokna.
Wakasad nambahkeun, eta kagiatan diharepkeun mampuh ngaraketkeun tali silaturahmi sarta nyehatkeun raga.
Nepi di Pantai Timur Pangandaran, rombongan Gowes Kemerdekaan sacara resmi dipapag ku Bupati Pangandaran, Jeje Wiradinata. ( Agus )
