Karawang, bewarajabar.com — Di tatar Karawang, ngagarap sawah rereana ku cara “ditraktor” nu dina basa wewengkon Karawang umumna disebut “ditalektor”, aya oge nu nyebut “diseki”, utamana di wewengkon Kecamatan Ciampel, Karawang tatar kidul.
Di Desa Kutapohaci, Kecamatan Ciampel, rata-rata para patani rengse “ngarambet mindo” (ngaberesihan gulma di sela-sela tangkal pare nu kadua kali), aya oge nu parena keur reuneuh jeung mimiti beukah (kaluar ranggeuyan pare anyar), sarta aya oge nu rengse panen tuluy sawahna dipelakan deui pare, cara sawah-sawah nu aya di Kampung Kedungwaru jeung Kebonkalapa.
Desa Kutapohaci tanahna napel wates jeung saluran irigasi Kalimalang (Tarum Barat). Jadi tanah sawah di ieu desa pangnampeuna ka saluran irigasi. Cai nu dikamalirkeun ngaliwatan bendungan “sekunder” jeung “tertier” lumangsung kalawan lancar.
[irp]
Lian ti eta, Desa Kutapohaci dikurilingan ku Citarum induk. Beulah wetan jeung beulah kaler desa, walungan Citarum nyadiakeun cai nu teu eureun-eureun ngocor tur bisa dipake nyaian sawah ku cara disedot make kompa cai.
Pantes mun ieu desa ku para inohong baheula dingaranan Kutapohaci, nu hartina “benteng pertahanan dewi pare”. Baheulana, ieu desa jadi benteng pertahanan ngalawan penjajah Walanda, sarta tempat nyadiakeun pare pikeun bekel perjuangan jeung hirup kumbuh umumna.
Kadieunakeun, di widang pertanian, Desa Kutapohaci kungsi jadi juara Suprainsus tingkat nasional. Naha sawah di Kecamatan Ciampel baris tetep aya di mangsa nu bakal datang? Sedengkeun kiwari Ciampel mangrupa salah sahiji kecamatan nu jadi puseur industri di tatar kidul Karawang.
