Bandung, bewarajabar.com – Walikota Bandung, Oded M Danial nyarek ka para pejabat katut ASN (Aparatur Sipil Negara) narima atawa ngirimkeun parsel sarta mudik ngagunakeun Mobdin (kendaraan dinas). “Ntong lah narima parcel. Teu meunang soteh alatan bakal mangaruhan kana kinerja,” tandesna, Senen (27/5/2019).
Eta panyarek sapagodos jeung pangeling ti KPK (Komisi Pemberantasan Korupsi) nu nyarek para pejabat narima atawa ngirim parsel, bingkisan, hadiah, jeung sajabana nu aya patula patalina jeung jabatan sarta pageduk jeung kawajiban atawa tugasna. Sabab eta hal bisa kaasup gratifikasi.
Dumasar Undang-undang No 20 Taun 2001 ngeunaan Perubahan tina Undang-undang No 31 Taun 1999 ngeunaan Pemberantasan jeung jabatan, tangtuna wajib ngalaporkeun ka KPK dina jangka waktu 30 poe kerja ti mimiti Tindak Pidana Korupsi, mun seug ASN atawa pejabat publik narima gratifikasi nu aya hubunganna tanggal narima gratifikasi.
Salian ti ngeunaan parsel, Oded meredih para ASN sangkan henteu ngagunakeun kendaraan dinas pikeun mudik. Eta hal saluyu jeung pameredih ti KPK No B/3956/GTF.00.02/01-13/05/2019 tanggal 8 Mei 2019, ngeunaan Imbauan Pencegahan Gratifikasi terkait Hari Raya Keagamaan.
Dina eta surat, KPK meredih sangkan henteu ngagunakeun fasilitas dinas pikeun kapentingan pribadi, kaasup make kendaraan dinas operasional pikeun mudik. Dina eta surat disebutkeun yen fasilitas dinas sakuduna ngan saukur digunakeun pikeun kapentingan nu aya patula patalina jeung kedinasan.
Dumasar eta hal, Oded teu ngijinan rengrengannana make kendaraan dinas pikeun mudik ka lemburna. Kendaraan dinas ngan digunakeun pikeun masilitasan pagawe nu tugas sawaktu libur hari raya.
Ku kituna, Oded meredih para pejabat make kendaraan pribadi pikeun mudik, sedengkeun nu teu boga kendaraan tinggal make kendaraan umum sangkan ngurangan volume kendaraan di jalan raya. “Sok marake kendaraan umum wae, tumaninah kari diuk. Insya Allah aman,” tandesna. (Amat Heryadin)
