Karawang, Bewarajabar.com — Awal taun 2021 darurat covid-19 mingkin pihariwangeun sabab suspec covid-19 jumlahna mingkin ngaronjat sarta nu maot mingkin loba, boh di Indonesia, boh di dunya. Kukituna kiwari pamarentah di mana-mana leuwih loba ngalaksanakeun “lock down”.
“Kitu deui sakola, dina Semester 2 ieu teu tiasa ngalaksanakeun pembelajaran tatap muka. KBM (kegiatan belajar mengajar) angger ngagunakeun sistem BDR (belajar di rumah),” ceuk Kepala SMPN 1 Ciampel, Karawang, Karmo Sucipto, M.Pd., nalika ditepungan Bewara Jabar di kantorna, kamari ieu.
Saterusna, Karmo Sucipto netelakeun, aya strategi pembelajaran nu bisa dilaksanakeun mangsa darurat covid-19 diantarana, “Strategi Komplementer 7 Metode Pembelajaran Masa Darurat Covid-19”, nyaeta:
- Pembelajaran Virtual, 2. Pembelajaran tematik terintegrasi berbasis proyek, 3. Pembelajaran melalui modul/LKS, 4. Home Visit 5. Televisi/radio dan media lainnya, 6. Grup media Sosial, 7. Penugasan berkala dan berstruktur.
“Ieu SMP ngalaksanakeun eta metode namung teu sadayana, teu acan tiasa ngalaksanakeun metode ‘Pembelajaran tematik terintegrasi berbasis proyek’”, ceuk Karmo Sucipto.
SMPN 1 Ciampel pernahna di Jl. Gono Tirtowidjojo Desa Kutapohaci, Kecamatan Ciampel, Kabupaten Karawang, sisi jalan nu kiwari teu weleh rame ku nu ngaliwat saprak Karawang tatar kidul jadi puseur kota industri.
Ieu sakola diadegkeun taun 1978 ku salah saurang warga Desa Kutapohaci, Gono Tirto Widjojo, pengusaha pelayaran PT PEL PN. Awal ngadeg ngaranna SMP PGRI Kutapohaci. Tuluy robah jadi SMPN Kutapohaci. Robah deui jadi SLTPN 2 Telukjambe. Saterusna jadi SMPN 2 Telukjambe. Ayeuna saluyu jeung aturan ngaran SMP kudu make ngaran kecamatan, ngaranna jadi SMPN 1 Ciampel.
“Alhamdulillah mangsa pandemi covid-19 ieu pembelajaran di SMPN 1 Ciampel lumangsung lancar. Sagala rupina tiasa dilaksanakeun saluyu sareng aturan nu aya,” ceuk Karmo Sucipto, M.Pd. di ahir obrolan jeung Bewara Jabar. (Sunta Atmaja)
