CIANJUR, BEWARAJABAR.COM — Kantor Redaksi Jabarnews.com Biro Cianjur diruksak ku jalma saliwat nu teu dikenal, tacan kapaluruh naon pasualanana nu matak ngalakukeun kitu.
Persatuan Wartawan Indonesia (PWI) Jabar manghajakalkeun kana tindakan oknum nu geus ngaruksak kantor Redaksi Jabarnews.com Biro Cianjur. Kulantaran kitu, PWI Jabar ngaharepkeun pihak Kepolisian, boh Polres Cianjur atawa Polda Jabar sagancangna ngayakeun tindakan tandes kanu ngaruksak eta kantor. Wakil Ketua Bidang Advokasi PWI Jabar Agus Dinar, ngeceskeun tindakan kurang pinuji ngaruksak wangunan kantor ngarupakeun tindakan nu ngarumpak hukum. Mana komo ngaruksak kantor redaksi nu geus eces pausahaan media pers.
Naon wae kasang tukangna, tindakan kitu teh tetep teu bener, ceuk Agus, Pers dina mancen tugas operasionalna ditangtayungan turta dumasar kana UU 40/1999 ngeunaan pers.
Samalah rengrengan media dina mancen tugas jurnalistikna, tetep napak turta panceg kana UU 40/1999 jeung Kode Etik Jurnalistik. Matak mun tea mah aya nu ngarasa dirugikeun ku berita, bisa lapor ka Dewan Pers. Eta jalur nu bener nurutkeun aturan, ulah sawenang-wenang ngayakeun tindakan sorangan
RelatedPosts
” Tindakan kurang pinuji ka pers mah ngan jalma bodo. Sabab pers mibanda fungsi jeung kawajiban ngabewarakeun informasi nu bener turta akurat, pikeun kapentingan masyarakat. Lian ti kitu oge boga tanggung jawab ka masarakat,” ceuk Agus. PWI Jabar nga-apresiasi ketak Polres Cianjur nu langsung ngayakeun reaksi kana eta kajadian. Tapi sok sanajan kitu, pihak PWI Jabar miharep Polisi sagancangna ngungkab sarta nyerek pelakuna, supaya katohyan naon motifna nu matak kitu, kalayan mun seug geus kacarek, ditindak tandes saluyu jeung hukum nu lumaku.
Anapon kronologisna, poe Salasa (24/12/2019) waktu wanci ngagayuh subuh, kantor redaksi Jabarnews.com biro Cianjur, di Kampung Warungkiara RT 3/9, Desa Sukamaju, Kecamatan Cianjur diserang ku dua jalma teu dikenal.
Dua jalma nu ngaruksak kantor Jabarnews.com teh, diduga datang ka eta tempat kira-kira tabuh 02.00 WIB. Datangna make motor matic (Honda Beat) taya plat nomeran.
Maranehna nu ngajorag norojog tanpa laratan, langsung ngahanca staf nu aya di eta kantor, disuntrungkeun nepika nabrak panto. Barang-batang nu aya di kantor diruksak, kaasup panghalang rohangan didobrak.
‘ Tanpa basa basi, teu rea carita, dua jalma nu ngajorag teh langsung narajang staf redaksi, malah disuntrungkeun nepika nabrak panto,” ceuk Mamat staf di kantor Jabarnews.com biro Cianjur.
Ketua PWI Kabupaten Cianjur Muhammad Ikhsan, ngarasa hanjelu turta manghanjakalkeun kana tindakan nu nyerang kantor biro Cianjur media online Jabarnews.com.
” Kuayana eta kajadian, kuring ge ngarasa heneg jeung ambek, asa teu puguh alesanana, make kudu nyerang jeung ngaruksak kantor media, ” pokna
Jeroning kitu pihak kepolisian, bakal nindak tandes ka pelaku nu nyerang
kantor media jabarnews.com. Sabab geus ngaganggu kamtibmas di wewengkon Cianjur.
“ Malah ieu mah kasus husus, jelas ngaganggu kabebasan pers nu ditangtayungan UU No 40 taun 1999 ngeunaan Pers,,” tandes Kapolres Cianjur AKBP Juang Andi Priyanto, S.I.K., S.H., M.Hum. (Ki Bully Tarongkeng)
