Karawang, bewarajabar.com — Guha Kutamasigit, tempat jarah di tanah Perhutani leuweung Kutatandingan lebah Desa Mulyasejati Kecamatan Ciampel, Karawang, geus ngabalukarkeun 4 urang tilar dunya, kakerem cai tina caah dengdeng nu minuhan eta guha, poe Minggu sawatara taun katukang.
Kajadianana, Poe Minggu rombongan jarah ti Desa Duren Kecamatan Klari miang ka Kutamasigit. Tabuh 14.00 dina kaayaan hujan, dipandu ku anak kuncen, nu jarah ngayakeun acara ritual, diantarana abdas di cai situ nu aya di jero guha.
Eta guha lawangna heureut tur rumpil. Sedengkeun jerona nu mangrupa situ lega pisan. Waktu rombongan abdas, ujug-ujug kaluar cai tina liang. Nu arabdas pahibut, paheula-heula kaluar ti guha ngaliwatan lawang nu heureut. Tilu urang teu kaburu kaluar, kakerem ku cai. Ditulungan ku anak kuncen, tapi nu nulungan ge sarua kakerem. Kabehanana tilar dunya.
Nu tilar dunya nyaeta Rahmat Saleh (28) warga Kampung Walahar I RT 01/01 Desa Walahar Kecamatan Klari, Rohim Saleh (37) warga Kampung Semang, Cikarang Selatan, Adi Setiawanardi (16) warga Kampung Duren RT 13/14 Desa Duren Kecamatan Klari, jeung Jaja (30, anak kuncen) warga Kampung Jati Desa Karangligar Kecamatan Telukjambe Barat.
“Nu angkat ka Kutamasigit, 11 urang. Aranjeunna diajak ku guruna, guru kabatinan, duka diajar naon nu saleresna. Nu kakuping mah saurna, diantarana, kantos newak jurig kana botolkeun. Guruna urang dieu. Murid-muridna oge seuseueurna urang dieu,” ceuk Wawan, mamangna Adi, salah saurang korban.
“Hanjakal, boh guruna boh rencangna nu salamet, teu langsung ngawartosan ka abdi dina dinten kajadian, dinten Minggu. Nembe ngawartosan wengi Salasa. Padahal dinten Senen enjing-enjing abdi nongton TV berita kajadian di Kutamasigit. Teu engeuh nu maot teh pun anak,” ceuk Aji bapana Adi.
Adi Setiawanardi, korban Guha Kutamasigit nu layonna kapanggih pangahirna ku Tim SAR. Layon Adi kapanggih ku saurang anggota Tim Taruna Siaga Bencana (Tagana) Karawang Salasa sore, di satukangeun batu sanggeus guha nu banjir disaatan ku pompa cai. Layon nu sejenna kapanggih memehna, nyaeta, layon anak kuncen kapanggih tengah peuting malem Salasa. Nu duaan deui kapanggih poe Senen sore. Nu neangan layon mangrupa tim SAR gabungan, ngawengku: Tagana, Sagara, Zhadul, LSM Gibas, jeung warga sabudeureun eta tempat.
