Haji Batal, Kumaha Dana Setoran Pelunasan Jamaah?

0

Jakarta, Bewarajabar.com — Pamarentah cindek ngabatalkeun jamaah miang ibadah haji 1441H/2020M, eta hal dumasar kana Keputusan Menteri Agama (KMA) No 494 taun 2020. Tuluy, ngeunaan dana setoran pelunasan jamaah haji kumaha?

Dina Sistem Informasi dan Komputerisasi Haji Terpadu (Siskohat) kacatet, aya 198.765 jamaah haji reguler nu geus munahan Biaya Perjalanan Ibadah Haji (Bipih) 1441H/2020M. Eta kabeh sumebar di 13 Embarkasi, nyaeta: Aceh (4.187 jamaah), Balikpapan (5.639), Banjarmasin (5.495), Batam (11.707), Jakarta-Bekasi (37.877), Jakarta-PondokGede (23.529), Lombok (4.505), Makassar (15.822), Medan (8.132), Padang (6.215), Palembang (7.884), Solo (32.940), jeung Surabaya (34.833).

Gedena waragad setoran turta punahna nu geus dibayarkeun teh rupa-rupa, luyu jeung embarkasi panginditan. Bipih pangsaeutikna nyaeta Embarkasi Aceh (Rp31.454.602) jeung panglobana Embarkasi Makassar (Rp38.352.602). Upama setoran awal ti jamaah haji Rp.25 juta, munahan setoran nu dibayarkeun diantarana aya nu Rp.6.454,602 nepika Rp.13.352.602.

Kumaha nasib dana setoran awal, Dirjen Penyelenggaraan Haji dan Umrah Nizar ngebrehkeun, yen dana setoran pelunasan jamaah haji 1441 H rek dilola ku Badan Pengelola Keuangan Haji (BPKH). Ngan, setoran pelunasan Bipih 1441H mah rek dilola kucara nu misah ku BPKH.

“Luyu jeung KMA No 494 taun 2020, dana setoran nu punah teh rek dilola kucara nu misah jeung nilai mangpaatna rek dibikeun ku BPKH ka jamaah haji elatna 30 poe saacan miang kloter munggaran penyelenggaraan haji 1442H/2021M,” ceuk Nizar di Jakarta, Rebo (03/06).

Salian ti eta, Kementerian Agama oge muka opsi sejen pikeun jamaah haji 1441H/2020M. Jamaah nu geus munahan jeung batal indit haji taun ieu, dana setoran pelunasan Bipih bisa menta dipulangkeun. Ngan, nu bisa menta dibalikeun teh nyaeta dana setoran awalna nu geus punah, lain dana setoran awal. Lantaran, mun seug jamaah nyokot oge dana setoran awalna, hartina manehna geus ngabatalkeun rencana daftar haji.

Baca Juga :  Tilu Fraksi di DPRD Kabupaten Bandung Nolak Pengesahan Parobahan APBD 2020

Pamenta dipulangkeunana ieu dana pelunasan teh, ceuk Nizar, ditepikeun ngaliwatan Kankemenag Kab/Kota tempat jamaah daftar. Engkena, Kankemenag nu bakal mroses ka Ditjen Penyelenggaraan Haji dan Umrah jeung satuluyna diproses ka BPKH.

“Engkena BPKH nu bakal nerbitkeun surat parentah mayar ka Bank Penerima Setoran (BPS), ngarah transfer eta dana setoran pelunasan ka rekening jamaah haji,” pokna.

Naha bet BPKH? Nizar ngebrehkeun, dana haji ti taun 2018 geus dipasrahkeun ka BPKH jeung dilola ku BPKH. Ku kituna aya Peraturan Pemerintah Nomer 5 Taun 2018 dina 13 Februari 2018. Eta aturan teh ngatur ngeunaan Pelaksanaan Undang-Undang Nomer 34 Taun 2014, ngeunaan Pengelolaan Keuangan Haji.

“Harita, (Februari 2018), kacatet dana haji aya kana Rp103 Triliunna, jeung ti saprak harita oge sakabehna geus jadi wewenang BPKH. Rilis nu katompernakeun BPKH nyebutkeun, danana geus nepika Rp135 Triliun,” ceuk Nizar.

Inyana ngembohan, kiwari Kementerian Agama geus teu miboga Tupoksi (tugas pokok jeung fungsi) pikeun ngurus, mana komo ngagolangkeun dana haji dina jirim naon wae oge.

(Sumber dari humas pusat dikirim oleh pranata humas jabar Hj.Tuti Herawati, SHI.)

LEAVE A REPLY

Please enter your comment!
Please enter your name here