Soreang, bewarajabar.com — Sangggeus ayana Kebijakan Umum Anggaran & Prioritas Plafon Anggaran Sementara (KUA-PPAS) RAPBD Parobahan 2020, kiwari giliran dua rarancang peraturan derah (Raperda) nu ditolak ku opat fraksi di DPRD Kabupaten Bandung. Kaopat fraksi nu nolak teh nyaeta PKB, Nasdem, Demokrat jeung PKS.
Ketua DPRD Kabupaten Bandung Sugianto netelakeun, yen ditolakna eta hal teh dina waktu DPRD Kabupaten Bandung ngayakeun rapat paripurna, sababaraha waktu katukang, patali jeung ngabahas ngeunaan opat Raperda.
“Kungsi aya beda pendapat dina paripurna, ngan dibahasna opat raperda eta teh tetep bakal diteruskeun ku panitia khusus (pansus) nu geus dibentuk,” pokna teh.
Dina rapat paripurna eta, ceuk Sugianto, kaopat raperda nu bakal dibahas teh nyeta ngeunaan rarancang detail tata ruang jeung peraturan zonasi perencanaan wilayah Bojongsoang, raperda ngeunaan tata ruang jeung peraturan zonasi kawasan terpadu pamukiman Tegal Luar, raperda ngeunaan parobahan ngeunaan peraturan derah No. 4 Taun 2013 ngeunaan ngalola cai limbah domestik jeung raperda ngeunaan nyinglaran sarta ngungkulan bahaya rentenir nu ngarupakeun raperda inisiasi ti DPRD.
Ku kituna, fraksi Golkar, Gerindra, PDIP, jeung PAN sapuk pikeun neruskeun ngabahas kaopat raperda eta. Ngan fraksi PKB, Nasdem, Demokrat jeung PKS nolak pikeun neruskeun ngabahas ngeunaan raperda rarancang detail tata ruang jeung aturan zonasi perencanaan wilayah Bojongsoang jeung raperda detail tata ruang perturan zonasi rarancang kawasan terpadu Tegalluar.
Leuwih jauh Sugianto netelakeun, ditolakna eta hal teh sabenerna ngarupakeun pamenta pikeun ngundur pembahasan, lain nolak ngeunaan pembahasanna komo deui nepika nolak raperdana mah.
“Sanggeus ayana gempungan panjang di Bamus jeung di Paripurna katilu fraksi ieu ngaluarkeun argumen patali jeung usulan nu di tunda atawa dibahas,” pokna deui.
Ku ayana beda pendapat eta teh, ceuk Sugianto, ngabalukarkeun dirina salaku pingpinan DPRD kapaksa ngaluarkeun kaputusan dumasar kana kronologis rapat-rapat samemehna. Kaasup carita panjang ti mimiti usulan, kajian, naskah akademik, rekomendasi gubernur, nepika rekomendasi teknis ti kementrian tata ruang nu kudu tetep dijadikeun tinimbangan utamana.
Nurutkeun Sugianto, pihakna kacida ngajenan pisan ku ayana alesan pandemi covid 19. Tapi kadua raperda eta oge bisa ngadatangkeun mangpaat nu hade. Ku kituna dina rapat paripurna, pihakna tetep netelakeun yen pembahasan eta teh bakal diteruskeun ku pansus nu geus dibentuk, sarta diusulkeun ku masing-masing fraksi di DPRD Kabupaten Bandung.
Kuayana hal eta, situasi politik di DPRD Kabupaten Bandung dina mangsa mapag pilkada 2020 katangen geus panceg. Nu matak dina pembahasan KUA-PPAS RAPBD 2020 oge ka opat fraksi nu nolak nyaeta PKB, Nasdem, Demokrat jeung PKS.
Sakumaha nu geus katangen, ka opat fraksi eta teh kasangtukangna partai koalisi nu ngarojong hiji pasangan calon. Sedengkeun Golkar jeung Gerindra ngarojong pasangan calon petahana, PDIP jeung PAN ngarojong hiji pasangan calon sejenna.
Najan kitu, Ketua Fraksi Nasdem Toni Permana netelakeun yen argumen nu ditepikeun ku fraksina sabenerna lain ngarupakeun hiji penolakan. Dirina oge nolak kalawan tandes yen argumen eta teh kacampuran ku peta koalisi Pilkada 2020.
“Taya patalina jeung koalisi Pilkada, lantaran pihakna ngan saukur ngabahas anggaran nu sabenerna taya kajelasan. Kitu oge ngeunaan diundurna pembahasan dua raperda, yen sakabeh eta teh tangtu aya alesanna nu jentre,” ceuk Toni.
Toni oge manghanjakalkeun ayana pihak nu ngagiring opini patali jeung penolakan ka arah publik. Komo deui opini nu dibentuk teh saperti PKB, Nasdem, Demokrat jeung PKS ngahaja ngahalang-halang eksekutif, utamana nolak ngeunaan KUA-PPAS RAPBD parobahan nu balukarna bisa dirasakeun ku sakabeh pihak.
“Tangtu eta hal teh perlu dilelempeng sangkan teu mangaruhan kana pelayanan ka masarakat. Wajar saupamana pihakna menta penjelasan jeung pembahasan ulang ti sababaraha komponen nu tujuanna masih kurang jelas. Komo deui anggaran eta teh patali jeung kapentingan publik,” ceuk Toni.
Toni miharep sangkan masarakat ulah salah persepsi ngeunaan masalah eta. Sabab tiap-tiap kaputusan nu dipasrahkeun kudu dipertanggungjawabkeun, lain ngan saukur di tandatangan kitu wae.
Sajeroning kitu, Wakil Bupati Bandung Gun Gun Gunawan nyebutkeun yen penolakan atawa pamenta ngeunaan ngabahas anggaran atawa perda di DPRD ngarupakeun hal nu wajar. Lantaran eta ngarupakeun aspirasi masarakat, sarta DPRD oge ngarupakeun perwakilan ti masarakat.
Leuwih jauh Gun Gun miharep sakabeh pihak bisa ngajenan kana proses jeung dinamika politik nu aya di DPRD. Salaku eksekutif, dirina oge hayang ngalengkah panceg sanggeusna aya rojongan nu jelas ti DPRD. **
