Karawang, bewarajabar.com — Seni Sunda has Karawang Topeng Banjet Grup “Mekar Munggaran” turunan Topeng “Baskom” (H. Cari) pingpinan Mamah Ranah Jenong manggung di acara “Gelar Budaya & Hajat Bumi” Pemerintah Desa Pacing, Kecamatan Jatisari, Karawang, sawatara waktu katukang.
Grup topeng nu ngadeg 14 Oktober 2015 kalayan mibanda SK grup seni ti Disparbud (Dinas Pariwisata dan Kebudayaan) Kabupaten Karawang teh geus manggung 46 kali dina waktu dua taun.
“Alhamdudillah urang Sunda aya keneh nu mikacinta topeng banjet. Unggal manggung teu weleh pinuh ku panongton,” ceuk Mamah Ranah Jenong pingpinan topeng banjet “Mekar Munggaran” nalika diajak ngobrol.
Grup topeng banjet “Mekar Munggaran” alamatna di Kampung Karangjati, Desa Karangjaya, Kecamatan Pedes, Karawang. Unggal bulan ieu grup teu weleh ditanggap ku nu hajat atawa ku panitia acara sejenna. Raramena manggung di bulan Sawal, Haji jeung Silih Mulud. Di bulan-bulan ieu dina sabulanna manggung nepi ka 15 kali.
Biaya manggung “Mekar Munggaran” beda-beda dumasar jauh-deukeutna nu nanggap. Di lemburna biaya manggung Rp 5,5 juta, di luar Kecamatan Pedes Rp 7 juta, di luar Kabupaten Karawang Rp 15 juta. Dina acara “Hajat Bumi” aya potongan harga (diskon) Rp 1 juta, dumeh mangrupa hiburan rayat.
Dina ngokolakeun grupna Mamah Ranah dibantuan ku wakilna, Suryanto, dulur misanna. Waktu magelaran, biasana Mamah Ranah jadi juru kawih jeung milu ngabodor. Ari Suryanto, jadi sutradara jeung pamaen (aktor) atawa “panjak topeng” (basa wewengkon Karawang).
