Karawang, bewarajabar.com — Tari Sugriwa Subali hasil kreasi pelatih tari SDN Nagasari II Karawang Barat, Tatang Sukari, nu kungsi tandang dina lomba “tari kreasi baru” FLS2N (Festival Lomba Seni Siswa Nasional) Kabupaten Karawang, manggung di sawatara acara resepsi jeung nu sejenna.
Nalika lumangsungna pintonan tari Sugriwa Subali dina FLS2N para panongton katingal hookeun nyaksian kamaheran para penari. Boh para panongton awam boh para panongton lulusan STSI anu apal sual seni, mere kamandang yen ieu tarian hade pisan.
Kitu ceuk guru oge pelatih tari ieu SD, Imas Permasih, S.Pd.SD, katut pelatih tari sejenna, Kurnia Suciati, S.Pd. jeung Tatang Sukari, S.Pd.
“Alhamdulillah tarian murangkalih hasil didikan abdi saparakanca estu nyugemakeun. Abdi reueus unggal manggung pintonan tarianna teu weleh rame ku panongton. Diantarana, ieu tari kantos disaksian ku para wisatawan Belanda di salah sahiji acara di Karawang Barat. Para wisatawan bengong bari keprok ningali tarian murangkalih,” ceuk Imas Permasih.
Tari Sugriwa Subali nu dipintonkeun ku para siswa SDN Nagasari II mangrupa “tari kreasi baru” dina wanda jaipongan hasil kreasi pelatih tari Tatang Sukari. Seniman nu oge guru SMP katut pupuhu sanggar tari “Puspa Wangi” teh geus sataun ngulik ieu tari saprak inyana meunang lagu Sugriwa Subali tanpa tarian ti salah saurang siswa SMKN 10 (SMKI) Bandung.
Di “Youtube” sumebar tari Sugriwa Subali versi SMKN 10 Bandung jeung versi sejenna. Tatang Sukari henteu engeuh versi mana nu pangheulana medal, naha versi “Puspa Wangi”, versi SMKN 10 Bandung atawa versi sejenna.
“Abdi ‘ngreasikeun’ ieu tari ti awal lagu Sugriwa Subali medal di Bandung sateuacan aya tarianna. Lagu nu masih kosong. Nalika abdi ningal tari Sugriwa Subali versi SMKN 10 Bandung sareng nu sanesna di “Youtube”, versi “Puspa Wangi” tos aya. Masing-masing mibanda ciri mandiri. Mangga dibandingkeun video antara tari ‘kreasi’ abdi sareng nu sanesna,” ceuk Tatang Sukari.
