Karawang, Bewarajabar.com — PT Penguin mere bantuan panampungan cai (toren) ka SDN Kutamekar II, Kecamatan Ciampel, Karawang, dina program “Penguin Peduli”. Eta panampungan cai dipasangkeun di tempat neundeun panampungan cai (tower) ku PT Mitra No Kai. Boh PT Penguin boh PT Mitra No Kai mangrupa pabrik nu aya di kawasan industri tatangga SDN Kutamekar II.
“Alhamdulillah, cai di ieu sakola lancar saparantos aya panampungan cai. Cai peryogi pisan kanggo kabutuhan di kamar mandi sareng wastafel (tempat kukumbah). Katambih mangsa corona ieu kedah aya wastafel di payuneun kelas,” ceuk Kepala SDN Kutamekar II Ridaryani, S.Pd. nalika ditepungan Bewara Jabar kamari ieu.
SDN Kutamekar II pernahna di tukangeun Kantor Desa Kutamekar Kecamatan Ciampel, teu jauh ti Kawasan Industri Suryacipta katut kawasan industri sejenna. Cai keur kabutuhan di kamar mandi jeung nu sejenna asalna ti saluran irigasi Kalimalang (Tarum Barat lebah BTB 9)
Cai disedot dua kali ku dua kompa cai. Kahiji, cai ti irigasi disedot ku kompa cai ka panampungan cai di tukangeun kantor desa. Kadua, cai disedot deui ka panampungan cai di tukangeun sakola. Nu ngagarap saluran cai ti irigasi ka panampungan cai kahiji nepi ka panampungan cai kadua nyaeta PT Mitra No Kai.
Anggang antara irigasi ka komplek SDN Kutamekar II kurang-leuwih 150 meter. Cai disalurkeun ti irigasi ngagunakeun pipah paralon nu dikubur di jero taneuh, ngaliwatan jalan cor Kalimalang (jalan nu ngahubungkeun puseur Kalimalang di Desa Curug Kec. Klari Kab. Karawang ka Jakarta)
SDN Kutamekar II taun 2020 meunang dana bantuan renovasi dua unit bangunan, nyaeta, ti Perum Peruri, bantuan dana renovasi saunit bangunan 4 lokal rohangan kelas jeung ti pamarentah, bantuan “dana alokasi khusus” (DAK) renovasi saunit bangunan 3 lokal rohangan kelas. Ku kituna, katiten, wangunan sakola weweg, meja jeung korsi siswa rapih, rohangan jeung buruan sakola beresih.
Lian ti lingkungan sakola nu beresih oge dipapaes ku pepelakan nu hejo ngemploh di emper-emper sakola, diantarana, aya pelak emes gede nu sok disebut oge “oyong” nu dina basa Indonesiana “blustru” (Luffa aegyptiaca). Blustru atawa “bulustru” nyaeta tutuwuhan ngarambat sabangsa bonteng nu buah ngorana sok disayur.
Warga nu sarakola di SDN Kutamekar II nyaeta barudak nu kolotna nganjrek di kampung sabudeureun sakola, nyaeta, di Kampung Cigempol, Kampung Sukasari, jeung Kampung Cikopo. Lulusan sakola 50 % neruskeun ka SMP KIC (Kawasan Industri Ciampel), tatangga sakola, 50% neruskeun ka SMP Negeri 1 Ciampel di Desa Kutapohaci, tatangga desa.
Jumlah siswa SDN Kutamekar II: 276, ngawengku; Kelas I: 48, Kelas II: 43, Kelas III: 50, Kelas IV: 37, Kelas V: 57, Kelas VI: 42, sumebar di 8 rombel (rombongan belajar), nyaeta: Kelas I, II, III-A, III-B, IV,V-A,V-B,VI.
Personal SDN Kutamekar II; Kepala Sekolah: Ridaryani, S.Pd.; Guru-guru: N. Aris Rulinah, S.Pd., Sunandar, Masitoh Laelasari, S.Pd., Wasum, S.Pd., Iman Hilmansyah, S.Pd.I, Hardyah Dewi Ayu N, Sofia Dewi Nurhasanah, Made Ayu Novia Putri, Novian Nuranwar: Operator Sekolah: Raka Aditya. (Sunta Atmaja)
