Karawang, bewarajabar.com — Bayu Mulus Rahayu penyiar Radio DSK (Duta Suara Karawang) unggal malem Kemis kungsi midangkeun acara “Gentra Panineungan”, macakeun sajak Sunda kiriman “para kanca” DSK (kontak monitor nu mikadeudeuh DSK) ti jam 21.00 nepi ka 23.00.
Acara macakeun sajak diselang ku lagu-lagu Sunda wanda degung. Gelik suling jeung haleuang tembang nambahan endahna acara nu sumebar di radio di tatar Karawang jeung sabudeureunna.
[irp]
Bayu nu kungsi nyuprih elmu di SMAN 3 Karawang jeung IKJ (Institut Kesenian Jakarta) teh mimiti ancrub di radio jadi penyiar di Sturada (Studio Radio Daerah) Karawang taun 1992. Tuluy di Radio ADS (Adyasamudra) Cikarang Bekasi taun 1995, RSPD (Radio Suara Pemerintah Daerah) Kharisma Purwakarta taun 1996, Radio Trimedia Majalaya Karawang taun 2001, Radio DSP (Duta Suara Parahiangan) Bekasi taun 2006 sarta ti taun 2011 nepi ka kiwari di Radio DSK.
Bayu Mulus Rahayu nu garan aslina Asep Syaifudin Zuhri sarta nalika di Trimedia katelah Yayang Sagala Hayang teh disela-sela kagiatan jadi penyiar oge maen sinetron di sawatara televisi.
[irp]
Di TVRI munggaran maen sinetron dina program Sepekan Sinetron Remaja taun 1992. Di Indosiar maen dina serial Dendam Nyi Pelet. Di SCTV maen dina program FTV Sinema Wajah Indonesia nu judulna “Dalang” jadi tokoh Sikun, “Pernikahan Delay” jadi tokoh H. Rojak, “Mendadak Mudik” jadi tokoh Merebot. “Di Indosiar lian ti jadi pamaen oge kantos jadi asisten sutradara,” ceuk Bayu mungkas obrolan jeung Bewara Jabar.
