Bandung,bewarajabar.com – Kolot diperedih henteu maksakeun barudakna pikeun asup sakola favorit. Dina sistem PPDB (Penerimaan Peserta Didik Baru) 2019 geus ditetepkeun tilu jalur asup nu disadiakeun.
Kitu diungkabkeun Ketua Komisi V DPRD Jawa Barat, Syamsul Bachri di Bandung, Senen (17/6/2019). “Lantaran ku sistem PPBD eta, tangtuna istilah sakola favorit kudu geus euweuh. Eta hal dina raraga nyaragamkeun kualitas tur ajen pendidikan,” pokna.
Syamsul ngajentrekeun, mekanisme PPDB 2019 beda jauh jeung 2018. Contona, dina PPDB 2018 aya istilah pendaftaran PPDB non akademik, ngawengku jalur prestasi, SKTM (Surat Keterangan Tidak Mampu) jeung keluarga guru. “Kiwari geus euweuh. Dina ayana ge presentasena leutik beda jeung taun samemehna,” tandesna.
Dumasar data nu aya, PPDB di Jabar dibagi kana tilu jalur. Kahiji, Jalur Zonasi nu kuota na 90 persen, ngaprioritaskeun jarak nu pangdeukeutna tina domisili ka sakola ku seleksi berbasis jarak (75 persen). Eta hal geus kaasup KETM (Keluarga Ekonomi Tidak Mampu) 20 persen jeung kombinasi jarak sarta prestasi akademik (15 persen).
RelatedPosts
Kadua, Jalur Prestasi kuota na 5 persen, bisa ku prestasi UN atawa non UN. Katilu, Jalur Perpindahan orang tua kuota na 5 persen, dumasar kana pindah tugas atawa nuturkeun tempat gawe orangtua calon peserta didik.
Nurutkeun Syamsul, anak didik nu ngabogaan prestasi dina bidang non akademik kudu diajenan. Mang hanjakalkeun mun seug maranehna eleh saingan balukar domisili imahna teu asup aturan zonasi.
Paling penting, ceuk Syamsul, aturan nu kiwari geus ditetepkeun bisa dilaksanakeun. Lian ti eta barudak nu mibanda prestasi kudu dibere rohangan, sangkan jenjang pendidikanna teu eureun ditengah jalan alatan pageduk jeung aturan. ( amat )
