Di Tegallega Talibaju Loba Kajojo

oleh
Jamingan dina parahu lebah pameuntasan Talibaju. (Poto: Sunta Atmaja)

Karawang, Bewarajabar.com — Pameuntasan parahu di Kampung Talibaju Desa Tegallega, Kecamatan Ciampel, Kabupaten Karawang, kajojo ku warga Desa Tegallega, nu meuntas ka Desa Cikaobandung Kecamatan Jatiluhur, Kabupaten Purwakarta.

Aya dua Kampung Talibaju, kenca-katuhueun walungan Citarum, nyaeta Kampung Talibaju Desa Tegallega jeung Kampung Talibaju Desa Cikaobandung. Warga dua kampung nu dibeulah ku Citarum teh mun patepung ngagunakeun parahu.

Munasabah mun pameuntasan Talibaju kajojo ku warga Desa Tegallega, sabab ieu tempat hiji-hijina pameuntasan nu nepungkeun warga  Desa Tegallega Kecamatan Ciampel ka wilayah Kecamatan Jatiluhur, utamana pikeun barudak warga Desa Tegallega  nu sakola di Jatiluhur.

Warga Desa Tegallega nu nganjrek pangkidulna, nu aya di wewengkon Dusun Parungnala, utamana, warga Kampung Talibaju jeung Kampung Tegaljaya, lebakeun pasir Namprak,  sanggeus tamat SD, lolobana neruskeun sakola ka SMPN Jatiluhur.

Jamingan, salah saurang warga Desa Tegallega nu kiwari jadi guru di SDN Tegallega II, geus biasa meuntas Citarum numpak parahu di pameuntasan Talibaju, ti keur dirina budak keneh nepi ka ayeuna jadi guru.

“Tamat SD abdi neraskeun sakola ka SMPN Jatiluhur. Salajengna neraskeun sakola ka SPGN Purwakarta. Jadi, abdi tos biasa meuntas Citarum di dieu,” ceuk Jamingan, seler Jawa nu geus muluhan taun nganjrek di Dusun Parungnala Desa Tegallega, netelakeun ka Wartawan Bewarajabar.com, di pameuntasan Talibaju.