Karawang, Bewarajabar.com — Nu dimaksud ka Tegallega jalan darat, nyaeta ngajugjug Desa Tegallega Kecamatan Ciampel, Kabupaten Karawang, henteu ngaliwatan pameuntasan Citarum di Desa Cilangkap Kecamatan Babakancikao, Kabupaten Purwakarta. Ieu mah ngaliwatan jalan Desa Mulyasejati Kecamatan Ciampel.
Ngajugjug Desa Tegallega, ti puseur kota Karawang maju ngetan rada ngidul ngaliwatan kelurahan jeung desa-desa nu aya di Kecamatan Karawang Timur, nyaeta Kelurahan Adiarsa Timur, Desa Warungbambu jeung Desa Kondangjaya.
Tuluy ka desa-desa di Kecamatan Klari, nyaeta Desa Anggadita, Desa Klari, Desa Gintungkerta nepi ka parapatan Kopel Desa Cibalongsari. Saterusna mengkol ngidul ngaliwatan bendungan Walahar nu oge disebut bendungan Parisdo di Desa Walahar. Tuluy meuntas sasak bendungan, nepi ka Desa Kutapohaci Kecamatan Ciampel.
Ti Desa Kutapohaci terus ngidul ngaliwatan Desa Mulyasari, tempat lomba dayung tingkat propinsi, tingkat nasional jeung tingkat internasional, nyaeta di situ Cipule. Ti dinya ngetan saeutik, terus ngidul mapay jalan cor sapanjang Desa Mulyasari, nepi ka jalan sisian Kalimalang (Tarum Barat). Lebah BTB 1 (Bendungan Tarum Barat Hiji) meuntas sasak, asup ka wilayah Desa Mulyasejati.
Lebah pasar Mulyasejati aya dua jalan, bisa langsung ngidul ngaliwatan tanah Kehutanan atawa ngetan heula mapay lembur-lembur sisi Citarum tuluy ngidul. Nepi ka jalan ieu, sawatara taun katukang, mun usum hujan moal bisa mawa kendaraan. Sabab jalan nu heureut teh turun-nanjak, bulat-beulit, sawareh henteu disirtu jeung kadangkala aya nu longsor.
Harita, cacakan geus usum halodo, aya keneh mobil mater di Kampung Narogtog. Muatan mobil diturunkeun. Motor kahalangan, hese liwat, kudu naek pasir, mapay gawir kukurubutan di nu bala.
Mun kakara sakali atawa dua kali ngaliwat ka ieu jalan, dijamin nyasab jeung keueung. Bisa nyasab ka lembur-lembur leutik sisi Citarum, bisa nyasab ka tanah Kehutanan. Sabab kadangkala jalan buntu leuwih mulus batan jalan utama. Keueungna, lebah tanah kehutanan tatangkalan caraneom, komo mun ngaliwat sorangan ti peuting.
Kiwari, jalan teh teu rusak teuing. Sabagian jalan geus dicor. Tapi, ari kakara ngaliwat mah angger kudu dianteur ku nu geus biasa ka lebah dinya atawa mun indit sorangan kudu loba tatanya. Kitu ge ari aya jalma. Seringna mah lebah tanah Kehutanan langka jalma ngaliwat.
Aya dua sakola di ieu desa, nyaeta SDN Tegallega I jeung SDN Tegallega II. Nu pangkidulna nyaeta SDN Tegallega II di Kampung Narogtog, peuntaseun Desa Cikaobandung Kecamatan Jatiluhur Kabupaten Purwakarta. Para siswa SDN Tegallega I jeung SDN Tegallega II neruskeun sakola ka SMPN 1 Babakancikao Purwakarta.jeung ka SMPN 8 Purwakarta.
Discussion about this post