Karawang, bewarajabar.com — Desa Pacing Kecamatan Jatisari Kabupaten Karawang mangrupa daerah pertanian dataran rendah di tatar kaler Provinsi Jawa Barat nu ngahasilkeun pare, sayuran palawija jeung supa.
Pare jeung sayuran palawija dipelak di sawah dina program “padi-padi-palawija”, nyaeta, dina sataun, dua kali melak pare, sakali melak sayuran palawija. Melak sayuran palawija dilaksanakeun dina lolongkrang waktu antara panen katiga jeung usum nyawah rendeng.
Tanah sawah nu dipake tatanen mangrupa sawah pengairan teknis nu legana 374 hektar, kalayan produksi gabah nepi ka 2.244 ton gkp (gabah kering panen), tina hasil panen 7 ton per hektar.
Tina 374 hektar tanah sawah, 11 hektar dipake tatanen palawija, boh nu dipelakan palawija dina lolongkrang waktu istirahat melak pare, boh nu husus dipelakan palawija sapanjang waktu (sabagian sawah nu dipelakan palawija).
Sayuran nu dihasilkeun ti Desa Pacing nu maneuh, nyaeta, bonteng, kacang panjang, paria, leor (baleor, kukuk, labu air), emes (oyong) jeung terong sarta sayuran nu biasa dipelak di pagunungan nyaeta kol kembang (blum kol) dataran rendah.
Lian ti eta, kiwari Desa Pacing ngahasilkeun sayuran supa (suung, jamur merang), utamana sanggeus para patani ngagabung dina “Gabungan Kelompok Tani” (Gapoktan) Supa nu dirojong ku pamarentah desa.
Kumbung tempat melak supa mekar ti ukur sabaraha hiji nepi ka 63 kumbung, nyaeta, 3 kumbung di Dusun I Kareo, 60 kumbung di Dusun II Karajan, kalayan produksi supa taun nepi ka 157,5 ton tina hasil panen 2,5 kwintal per kumbung.
Ku ayana ieu hasil supa, sawatara taun katukang Desa Pacing meunang prestasi mangrupa: Juara 1 Tingkat Kabupaten bidang Budidaya Jamur Merang, Juara 3 Tingkat Provinsi Jawa Barat bidang Budidaya Jamur Merang jeung Nara Sumber Tingkat Nasional.
